کراچی میں وزیراعلیٰ ہاؤس کے باہر احتجاج کے دوران پولیس کی شیلنگ اور لاٹھی چارج میں مبینہ زخمی ہونے والا ایم کیو ایم پاکستان کا عہدیدار جاں بحق ہوگیا۔
سندھ میں بلدیاتی قانون کیخلاف وزیراعلیٰ ہاؤس کے باہر ایم کیو ایم پاکستان کی جانب سے مظاہرہ کیا گیا تھا، احتجاج کرنے والوں پر پولیس نے شیلنگ اور لاٹھی چارج کیا تھا۔
احتجاج کے دوران ایم پی اے صداقت حسین سر پر ڈنڈا لگنے سے گر پڑے، پولیس نے ڈنڈا ڈولی کرکے انہیں حراست میں لے لیا۔
رپورٹس کے مطابق پولیس نے تمام گرفتار افراد کو رہا کردیا ہے۔
دوسری جانب سندھ حکومت کے ترجمان مرتضیٰ وہاب نے جانی نقصان پر اظہار افسوس کرتے ہوئے وضاحت کی کہ جناح اسپتال میں اسلم بھائی نامی کوئی شخص نہیں لایا گیا تھا۔