لندن (وجاہت علی خان) مراکش میں دو ہفتے قبل آنے والے ہولناک زلزلے کے بعد المصطفیٰ ویلفیئر ٹرسٹ نے متاثرین کیلئے امدادی سرگرمیاں تیز کر دی ہیں اس سلسلہ میں المصطفیٰ ٹرسٹ کے چیئرمین عبدالرزاق ساجد ٹیم کے ساتھ لندن سے مراکش کے آفت زدہ علاقے Atlas Mountain پہنچے تھے جہاں انہوں نے مراکش میں موجود اپنی مقامی ٹیم کے ساتھ مل کر بے گھر افراد میں کھانے پینے کی اشیا اور ضروری دواؤں کی بڑی کھیپ تقسیم کی۔ عبد الرزاق ساجد نے بتایا کہ مراکش میں موجود ہمارے بیس کیمپ سے مسلسل امدادی سرگرمیاں جاری ہیں، انہوں نے کہا ہم روزانہ 50 میل دور سے تباہ حال علاقوں میں پہنچتے تھے اور انتہائی خطرناک راستوں سے گزر کر ریلیف کا کام کرتے تھے، عبدالرزاق ساجد نے کہا کہ تباہی اس قدر شدید ہے کہ زلزلہ زدہ علاقے میں کوئی شخص بھی اپنے گھر میں نہیں رہ رہا کیونکہ بہت بڑی تعداد میں گھر تباہ ہوچکے ہیں اور جو مکمل تباہی سے بچ گئے ہیں وہ بھی رہائش کیلئے محفوظ نہیں ہیں، ایک محتاط اندازے کے مطابق تین لاکھ سے زیادہ افراد بے گھرہیں جو خیمہ بستیوں میں رہ رہے ہیں،روڈ انفراسٹرکچر مکمل طور پر تباہ ہو چکا ہے، انہوں نے کہا المصطفیٰ ویلفیئر ٹرسٹ کی ہماری مقامی ٹیم فیملی فوڈ پیکٹس، ایمرجنسی میڈیکل سپلائی اور خیموں کا بندوبست بھی کر رہی ہے لیکن بہت بڑے پیمانے پر ریلیف کی ضرورت ہے، اس لئے ہم یوکے سے بھی امدادی رقوم اور متاثرین کیلئے دیگر ضروری اشیا کا بندوبست کرنے کی کوششش کر رہے ہیں جس کیلئے ہمارے ڈونرز بھی ہمارے ساتھ تعاون کر رہے ہیں۔