فرمان الہی
نماز کے اوقات
برسلز (حافظ اُنیب راشد) یورپین یونین کے ممبر ممالک اسپین، اٹلی اور پرتگال میں سورج سے توانائی حاصل کرنے کے 120نئے منصوبوں پر 1ارب 70 کروڑ یورو خرچ کئے جائیں گے یہ بات یورپین کمیشن کی جانب سے جاری اعلامیے میں بتائی گئی۔ اعلامیے کے مطابق یورپی توانائی کی ضروریات میں خود کفالت اور ان منصوبوں کو فوسل فیول کی بجائے قابل تجدید توانائی (سولر) کے ذریعے حاصل کرنے کیلئے 120نئے منصوبے شروع کیے جارہے ہیں۔ سورج سے توانائی حاصل کرنے کے یہ تمام پلانٹس اسپین، اٹلی اور پرتگال کے ایسے کمزور معاشی علاقوں میں لگائے جائیں گے جہاں کے لوگوں کی آمدنی یورپین معیار سے کم ہے۔ ان منصوبوں پر ایک اعشاریہ 7ارب یورو لاگت آئے گی اور یہ 2028میں پوری طرح فعال ہوں گے۔ 5.6 جیگا واٹ(GW) پیداوار کے حامل ان منصوبوں سے ڈھائی لاکھ گھروں کو بجلی مہیا ہوگی۔ یہ تمام رقم یورپین انوسٹمنٹ بینک کے پروگرام کے تحت خرچ کی جائے گی۔ اس منصوبے کی تعمیر کے دوران 11000سے زائد لوگوں کو عارضی روزگار بھی میسر آئے گا۔ اس حوالے سے یورپین کمشنر برائے اقتصادیات پاؤلو جینٹیلونی نے کہا کہ یہ آب و ہوا اور ہماری معیشت دونوں کیلئے اچھی خبر ہے، اس سے نہ صرف لاکھوں گھرانوں کو صاف توانائی سے بجلی فراہم کرنے میں مدد ملے گی بلکہ متعلقہ علاقوں میں تعمیراتی مرحلے میں ہزاروں ملازمتیں بھی پیدا ہوں گی۔
