• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

13جولائی کے شہداء کو ہرگز فراموش نہیں کیا جاسکتا،علی رضا سید

آج کا اخبار
یورپ سے
14 جولائی ، 2024
برسلز (حافظ اُنیب راشد) کشمیرکونسل ای یو کے چیئرمین علی رضا سید نے کہا ہے کہ تیرہ جولائی کے شہدائے کشمیر نے قربانیوں کی عظیم داستان رقم کی ہے، ہم تیرہ جولائی کے شہداء کو ہرگز فراموش نہیں کر سکتے۔ انہوں نے یہ بات تیرہ جولائی کے یوم شہداء کی مناسبت سے برسلز میں منعقدہ کشمیرکونسل کی کورکمیٹی کے اجلاس سے خطاب کرتے ہوئے کہی۔ انہوں نے مزید کہاکہ کشمیر کے شہداء نے اپنے خون سے جدوجہد آزادی کی آبیاری کی ہے خاص طور تیرہ جولائی 1931کے شہداء نے آزادی کشمیر کی تحریک کو بنیادی تقویت و حوصلہ فراہم کیا ہے۔ یاد رہے کہ تیرہ جولائی 1931کو اس وقت کے ڈوگرہ راج کے حکم پر سرکاری اہلکاروں نے فائرنگ کرکے سری نگرجیل کے باہر ان بائیس کشمیریوں کو شہید کردیا تھا جو ایک کشمیری رہنما عبدالقدیر کے خلاف مقدمے کی کاروائی دیکھنے کے لیے کئی دیگر لوگوں کے ساتھ جیل کے باہر جمع تھے۔ چیئرمین کشمیرکونسل ای یو نے کہاکہ اگرچہ مظالم کا سلسلہ طویل عرصے سے جاری ہے لیکن 2019کے بعد جب سے مودی حکومت نے جموں و کشمیر کی خصوصی حیثیت ختم کی ہے اس وقت سے کشمیریوں پر بھارتی مظالم بڑھ گئے ہیں۔ قتل و غارت شدت سے جاری ہے اور متعدد کشمیری رہنماء اور انسانی حقوق کے کارکن پابند سلاسل ہیں۔ علی رضا سید نے مقبوضہ کشمیر میں مظالم بند کروانے کا مطالبہ کیا اور کہا کہ عالمی برادری بشمول یورپی یونین بھارت پر دباؤ ڈالے تاکہ بھارت مقبوضہ کشمیرکے لوگوں پر ظلم و ستم بند کرے ۔ اپنی قابض افواج کو مقبوضہ کشمیر سے نکالے، کشمیریوں کی نسل کشی و قتل و غارت کو بند کرے اور این جی اوز اور انسانی حقوق کی تنظیموں کو جموں و کشمیر آنے کی اجازت دی جائے۔ اس کے علاوہ انسانی حقوق کے بارے میں عالمی اداروں کے معاہدوں اور مسئلہ کشمیر کے حوالے سے اقوام متحدہ کی قراردادوں پر عمل درآمد کروایا جائے۔ انہوں نے یاسین ملک، شبیرشاہ اور خرم پرویز سمیت بھارتی جیلوں میں پابند سلاسل تمام کشمیریوں کی رہائی کا مطالبہ کیا۔ اجلاس کے دیگر شرکاء نے بھی شہدائے 13 جولائی کو زبردست خراج عقیدت پیش کیا۔ انہوں نے کہاکہ بھارتی فوجیوں کی طرف سے ظلم و ستم کا سلسلہ شدت سے جاری ہے اور بھارتی حکام نے پچھلے چند سالوں کے دوران کشمیری نوجوانوں کو بڑی بے دردی سے اپنے مظالم کا نشانہ بنایا ہے۔ انہوں نے مزید کہاکہ انسانی حقوق کے کئی علاقائی اور عالمی ادارے مقبوضہ کشمیر میں بھارتی مظالم پر تشویش ظاہر کرچکے ہیں۔ اجلاس کے شرکاء نے مطالبہ کیا کہ کشمیریوں کو ان کا حق خودارادیت دلوایا جائے۔ اور مسئلہ کشمیر کا پرامن حل تلاش کیا جائے۔
یورپ سے سے مزید