فرمان الہی
نماز کے اوقات
راولپنڈی (نمائندہ خصوصی)کپتان کی ناقص حکمت عملی اور خراب کارکردگی کے باعث خواتین ورلڈ کپ میں بھارت نے پاکستان کو 107رنز سے شکست دے دی۔ بسمعہ معروف نے بھارتی بیٹرز پر دبائو بڑھانے کے بجائے دفاعی فیلڈنگ لی اور بھارت بڑا اسکور کرنے میں کامیاب ہوگیا۔ اتوار کو نیوزی لینڈ کے شہر ماؤنٹ منگنوئی میں بھارت نے ٹاس جیت کر پہلے کھیلتےہوئے 7 وکٹ پر 244 رنز بنائے ۔ سمرتی مندھانا، سنیہا رانا اور پوجا وستراکار نے نصف سنچریاں اسکور کیں ، پاکستان کی جانب سے ندا ڈار اور نشرا سندھو نے 2،2 جب کہ ڈائنا بیگ، انعم امین اور فاطمہ ثنا نے ایک ایک وکٹ حاصل کی۔ جواب میں بھارت کی تباہ کن بولنگ سے پاکستانٹیم 137 رنز پر ہی ڈھیر ہوگئی ۔ سدرہ امین نے30 جب کہ ڈائنا نے 24 رنز بنائے ۔ بھارت کی جانب سے راجیشواری گائیکواد نے 4، جھولن گوسوامی اور سنیہا رانا نے 2،2 کھلاڑیوں کو آؤٹ کیا۔پاکستانی ٹیم دوسرا میچ منگل کو آسٹریلیا کے خلاف کھیلے گی۔
