فرمان الہی
نماز کے اوقات
برسلز( حافظ انیب راشد ) پاکستان میں تحریک انصاف کی حکومت کے خاتمے کے خلاف یورپین دارالحکومت برسلزمیں اوورسیز پاکستانیوں نے ایک بڑا مظاہرہ کیا۔ یورپین پارلیمنٹ کے باہر پلس لکسمبرگ پر منعقد ہونے والے اس مظاہرے میں بلجیم کے مختلف شہروں سے آئے ہوئے پاکستانیوں نے سیکڑوں کی تعداد میں شرکت کی جن میں خواتین کی ایک بڑی تعداد بھی شامل تھی۔ اس مظاہرے کی خاص بات لکسمبرگ سمیت ارد گرد کے علاقوں سے ایسی فیملیز کی ایک بڑی تعداد کی شرکت تھی جو آج تک کبھی کسی مظاہرے کا حصہ نہیں رہے۔ اس موقع پر پی ٹی آئی کی مقامی رہنماؤں شکیل گوہر، غلام ربانی بابو ، مہر صفدر علی، سردار صدیق خان، زاہد بھدر، شعیب خان، آصف برلاس، چوہدری تجمل فاروق چیمہ، مہر عبدالمالک، رخسانہ عزیز، وسیم اختر، طاہر لون، مادام فریدہ ،آصف خان اور دیگر نے خطاب کرتے ہوئے پاکستان میں عمران خان کی حکومت کو گرانے کیلئے اختیار کردہ طریقہ کار اور اس میں حصہ دار کرداروں کو ہدف تنقید بنایا ۔ اس کے ساتھ ہی مقررین نے اس مظاہرے سمیت پاکستان بھر میں ہونے والے مظاہروں میں عوام کی بھر شرکت کو عمران خان کی پالیسیوں سے متفق ہونے کی دلیل کے طور پر پیش کیا۔ انہوں نے کہا کہ قوم باشعور ہو چکی ہے اور وہ پاکستان میں امپورٹڈ گورنمنٹ کے بیانیے کی بھر پور تائید کرتے اور اسے قبول کرتے ہیں، جسے عمران خان نے اپنایا ہے اور عمران خان کے ساتھ کھڑی ہے ۔ اس مظاہرے کے دوران مقامی یوتھ ونگ کے صدر ندیم شاہ نے سابق وزیر اعظم کی سیاسی فنڈ ریزنگ کی اپیل پر لبیک کہتے ہوئے پچاس لاکھ روپے دینے کا اعلان کیا۔ جبکہ دیگر نے بھی پی ٹی آئی کی اپیل پر اسی طرح کے جذبے کا اظہار کیا۔ اس مظاہرے میں بھی شرکا نے شہباز شریف حکومت کے خلاف اپنے جذبات کے اظہار کیلئے انہی نعروں ، انہی فقرات اور سلوگنز کو اپنایا جو تحریک انصاف کے جلسوں میں اختیار کیے جاتے ہیں۔ شرکا نے تحریک انصاف کے مطالبات پر مشتمل ہورڈنگز سمیت پارٹی پرچم بڑی تعداد میں اٹھا رکھے تھے۔ مظاہرے میں قومی پرچم بھی بڑی تعداد میں نظر آرہے تھے۔
