کراچی: کئی سڑکوں پر بارش کا پانی موجود، ٹریفک کی روانی متاثر

23 جون ، 2022

کراچی میں گزشتہ روز ہونے والی موسمِ گرما کی پہلی بارش کے بعد بیشتر سڑکوں سے پانی کی نکاسی کر دی گئی ہے جس کے بعد صورتِ حال بہتر ہے۔

تاہم کئی بڑی شاہراہوں اور چوراہوں پر اب بھی بارش کا پانی جمع ہے جو ٹریفک کی روانی کو متاثر کر رہا ہے۔

بارش میں حادثات، 5 افراد جاں بحق

کراچی میں گزشتہ روز کی اچانک بارش اور طوفانی ہواؤں سے مختلف حادثات میں 2 بچوں سمیت 5 افراد جاں بحق ہو گئے۔

ناظم آباد 2 نمبر کے قریب گجر نالہ اور نارتھ کراچی شادمان ٹاؤن کے قریب نالہ ابلنے سے پانی سڑک پر آ گیا۔

جہانگیر روڈ پر دونوں جانب کھلا نالہ شہریوں کے لیے وبال بن گیا۔

بورڈ، کھمبے، درخت، دیواریں گر گئیں

ملیر میں بجلی کے کھمبے، دیواریں اور دکانوں کے شیڈز گر گئے۔

ملیر کے علاقے شمسی سوسائٹی کی مختلف گلیوں میں بارش کا پانی موجود ہے، بارش سے درخت اور بجلی کے پول گرے ہوئے ہیں۔

بجلی کے پول گرنے سے شمسی سوسائٹی میں کل سے بجلی معطل ہے۔

ڈرگ روڈ کے قریب ایئر پورٹ جانے والے ٹریک پر بارش کا پانی جمع ہے۔

آئی آئی چندریگر روڈ پر بڑا سائن بورڈ گر گیا تاہم اس سے کوئی جانی نقصان نہیں ہوا، عدالتی حکم کے باوجود شہر میں کئی جگہ پر سائن بورڈز اب بھی نصب ہیں۔

کئی شاہراہوں پر پانی موجود

شارعِ فیصل، نیپا چورنگی، جہانگیر روڈ سمیت دیگر علاقوں سے برساتی پانی کی نکاسی کر دی گئی ہے، البتہ ان علاقوں سے متصل گلیوں میں بارش کا پانی جمع ہے۔

گرومندر چورنگی، یونیورسٹی روڈ پر پرانی سبزی منڈی کے قریب نیوٹاؤن تھانے کے سامنے برساتی پانی جمع ہے۔

ناگن چورنگی سے سہراب گوٹھ کی جانب جانے والی سڑک پر بارش کا پانی جمع ہونے سے ٹریفک کی روانی متاثر ہے، سہراب گوٹھ انڈر پاس میں بھی بارش کا پانی کچھ مقدار میں موجود ہے۔

لیاقت آباد میں صرافہ مارکیٹ کی مرکزی سڑک اور گلیاں پانی میں ڈوبی ہوئی ہیں۔