فرمان الہی
نماز کے اوقات
پروفیسر اعجاز احمد فاروقی کی جانب سے پی سی بی انٹر ڈسٹرکٹ انڈر 19 کرکٹ ٹورنامنٹ کی فاتح سی سی اے زون دو کے کھلاڑیوں اور داود اسپورٹس کرکٹ کلب کی دو سالہ شاندار کارکردگی پر ٹی ایم سی کرکٹ گراونڈ پر عشائیے کا اہتمام کیا گیا تقریب سے خطاب کرتے ہوئے میزبان پروفیسر اعجاز احمد فاروقی نے کہا سی سی اے زون دو کی انڈر 19 کرکٹ ٹیم نے پی سی بی انٹر ڈسٹرکٹ انڈر 19 کرکٹ ٹورنامنٹ میں شاندار کارکردگی کا مظاہرہ کرتے ہوئے ٹورنامنٹ جیتنے کا اعزاز حاصل کیا یقینی طور پر یہ پذیرائی کے مستحق ہیں میں نے ہمیشہ جونئیر ، سینئیر سطح پر اعلٰی کارکردگی کا مظاہرہ کرنے والوں کی حوصلہ افزائی کی ہے۔
اس موقع پر خطاب کرتے ہوئے ٹیسٹ کرکٹر توصیف احمد نے کہا کہ سی سی اے زون دو کی کارکردگی ہمیشہ سے اچھی رہی ہے اس زون میں گراس روٹ لیول پر بہت کام ہوا ہے، جمیل احمد نے کہا کہ سی سی اے زون دو انڈر 19 نے انٹرڈسٹرکٹ کرکٹ ٹورنامنٹ میں بہترین کھیل پیش کیا ان کی شاندار کارکردگی کا اندازہ اس بات سے لگایا جاسکتا ہے کہ وہ پورے ٹورنامنٹ میں ناقابل شکست رہے، تقریب سے محمد توصیف صدیقی ، جاوید خان ، ڈائریکٹر اسپورٹس کے ڈی اے ایاز منشی ، اصغر عظیم ، ظفر احمد ، محمد رئیس ، شہزاد عالم اور مظہر اعوان نے بھی خطاب کیا۔
ورلڈ بیس بال سافٹ بال کنفیڈریشن کی چوتھی کانگریس کے موقع پر ہونے والے الیکشن میں اٹلی کے ریکارڈو فریکاری، صدر جبکہ ملائشیاء کی داتو لو بینگ چو، اگلے چھ سالوں کیلئے ڈبلیو بی ایس سی کی سیکریٹری جنرل منتخب ہوگئیں ، سافٹ بال فیڈریشن آف پاکستان کے صدر حیدرخان لہری، سیکریٹری جنرل آصف عظیم اور پاکستان فیڈریشن بیس بال کے صدر سید فخرعلی شاہ نے ریکارڈو فریکاری اور بینگ چولو کو دوبارہ ڈبلیو بی ایس سی کاصدر اور سیکریٹی جنرل منتخب ہونے پر مبارکباد دی ہے۔
کانگریس اجلاس میں متفقہ طور پر چھ نئی قومی فیڈریشنوں کی رکنیت کی منظوری دی جن میں سعودی عرب، بھوٹان، بلغاریہ، کیپ وردے، لاؤس اور ٹونگا بال کے نام شامل ہیں اس کے علاوہ پہلے ڈبلیو بی ایس سی بیس بال 5 ورلڈ کپ کو رواں سال 7 سے 13 نومبر تک میکسیکو میں کرانے کی منظوری دی گئی، ایشین جمناسٹک یونین کی جانب سے پاکستان میں پہلی بار انٹر نیشنل جمناسٹک کوچز کے لیے تربیتی کورس لاہورمیں ختم ہوگیا ،جس میں پاکستان کے علاوہ انڈونیشیا اردن، ایران، بنگلہ دیش، افغانستان اور نیپال کے 22جمناسٹ نےحصہ لیا۔
کورس میں ایران سے تعلق رکھنے والے ماہر جمناسٹ سید رضا حسین کی سربراہی میں پاکستان و دیگر ممالک کے کوچز نے تربیتی اور تکنیکی امور پر لیکچر دیا۔ کورس کی افتتاحی تقریب کے مہمان خصوصی پاکستان اولمپک ایسو سی ایشن کے سیکریٹری جنرل خالد محمود تھے جبکہ اس موقع پر مختلف اسپورٹس فیڈریشنز کے صدور و سیکرٹریز بھی موجود تھے۔افتتاحی سیشن میں پاکستان جمناسٹک فیڈریشن کے صدر احمد علی راجپوت اور سیکریٹری جنرل پرویز احمد نے کورس کی اہمیت کے بارے میں شرکا کو آگاہ کیا۔
