شہباز گل پر تشدد کی جوڈیشل انکوائری کی جائے، فواد چوہدری

17 اگست ، 2022

پی ٹی آئی رہنما اور سابق وفاقی وزیر فواد چوہدری نے کہا ہے کہ شہباز گِل جو سب سے بڑی جماعت کے لیڈر کا چیف آف اسٹاف تھا اس کو اٹھایا گیا، تشدد کیا گیا اس کی جوڈیشل انکوائری کی جائے۔

اسلام آباد کی ڈسٹرکٹ اینڈ سیشن کورٹ میں پی ٹی آئی رہنما شہباز گِل کا جسمانی ریمانڈ مسترد ہونے کے حکم کے خلاف نظرثانی درخواست کی سماعت کے دوران فواد چوہدری کمرۂ عدالت میں موجود تھے۔

فواد چوہدری نے شہباز گِل کے خلاف سماعت ختم ہوجانے اور فیصلہ محفوظ کیے جانے کے بعد میڈیا سے بات کرتے ہوئے بتایا کہ شہباز گِل کے جسمانی ریمانڈ کیس پر تین گھنٹوں میں طویل دلائل دیے گئے۔

پی ٹی آئی رہنما کاکہنا تھا کہ سوشل میڈیا مہم سے پی ٹی آئی کو جوڑنا غلط ہے، ججز انسانی حقوق کی حفاظت کے لیے ہوتے ہیں،امید ہے کہ شہباز گِل کو تشدد کے لیے ان کے حوالے نہیں کیا جائے گا۔

انہوں نے کہا کہ عمران خان پاکستان کا اثاثہ ہیں ان کی آواز پر پورے ملک میں لوگ اکٹھے ہوتے ہیں۔

سابق وفاقی وزیر نے کہا کہ امید ہے عدالت مزید ٹارچر کے لیے شہباز گِل کو پولیس کے حوالے نہیں کرے گی، اگر شہبازگل کا ریمانڈ دیا جاتا ہے تو پی ٹی آئی پہرہ دےگی۔

انہوں نے بتایا کہ اڈیالہ جیل میں تحریک انصاف کے رہنماؤں کو شہباز گِل سے ملنے سے روکا گیا، حکومت کی جانب سے حسن نواز کے بجائے شہزاد اکبر کا نام ای سی ایل میں ڈال دیا گیا۔

قومی خبریں سے مزید