فرمان الہی
نماز کے اوقات
سوات(ٹی وی رپورٹ)سوات کے علاقے کبل میں سی ٹی ڈی تھانے کے اندر ہونے والے دھماکوں میں 15 پولیس اہلکار شہید ہوگئے۔ ڈی آئی جی سی ٹی ڈی خالد سہیل کے مطابق تھانہ سی ٹی ڈی کبل میں 2 دھماکے ہوئے، دھماکے سے تھانے کی عمارت بیٹھ گئی، دھماکے سے علاقے کی بجلی منقطع ہوگئی، تھانے میں اسلحہ اور مارٹر گولے بھی موجود تھے، ممکن ہے مارٹر گولے پھٹنے سے دھماکے ہوئے ہوں، خود کش دھماکا بھی ہو سکتا ہے۔ دھماکے کی نوعیت معلوم کی جا رہی ہے۔ ڈی آئی جی سی ٹی ڈی کا کہنا تھا دھماکا تھانے کے گیٹ پر نہیں ہوا، عموماً خود کش حملہ آور گیٹ پر ہی خود کو اڑا دیتا ہے، تھانےکی عمارت پرانی تھی، بیشتر دفاتر اور اہلکار نئی عمارت میں تھے۔ آئی جی خیبرپختونخوا اختر حیات گنڈاپور نے دھماکے میں5 افراد کی شہادت اور 15 افراد کے زخمی ہونے کی تصدیق کرتے ہوئے بتایا کہ صوبے میں سکیورٹی ہائی الرٹ ہے۔ بعد ازاں پولیس حکام نے بتایا کہ تھانے کے اندر ہونے والے دھماکے میں شہید پولیس اہلکاروں کی تعداد15 ہوگئی ہے جبکہ 40 افراد زخمی ہیں۔ محکمہ صحت خیبرپختونخوا نے سوات کے اسپتالوں میں ایمرجنسی نافذ کردی ہے اور متاثرہ افراد کو ہنگامی بنیادوں پر علاج فراہم کرنے کا کہا ہے۔ وزیر داخلہ رانا ثنا اللہ نے دھماکے کی مذمت کرتے ہوئے قیمتی جانی نقصان پر افسوس کا اظہار کیا اور کہا ہے کہ دہشت گردی کے اس ناسور کو جلد جڑ سے اکھاڑ پھینکیں گے۔ گورنر سندھ کامران خان ٹیسوری نے بھی دھماکےکی مذمت کی ہے۔
