خیبر پختونخوا کی سینئر پولیس آفیسر سونیا شمروز کیلئے عالمی ایوارڈ

لندن (زاہدانور مرزا) پاکستانی خواتین جہاں ملکی ترقی اور خوشحالی میں اہم کردار ادا کر رہی ہیں وہاں عالمی سطح پر ملک کا نام روشن کرنے میں بھی پیچھے نہیں ہیں۔ خیبر پختونخوا کی سینئر سپرنٹنڈنٹ آف پولیس اور ڈسٹرکٹ پولیس آفیسر بٹگرام سونیا شمروز خان نے عالمی ایوارڈ اپنے نام کرلیا۔ ڈی پی او بٹگرام سونیا شمروز کو بہترین پولیسنگ اور خواتین پر تشدد کی روک تھام پر ایوارڈ دیا گیا۔ ایس ایس پی سونیا شمروز کو انٹرنیشنل ایسوسی ایشن آف ویمن پولیس نے ایوارڈ دیا اور انہیں نیوزی لینڈ کے شہر آکلینڈ میں پولیس آفیسرآف دی ائر ایوارڈ سے نوازا گیا۔ سونیا شمروز خان ڈی پی او چترال اور دیگر عہدوں پر بھی کام کرچکی ہیں۔ انہوں نے جبری شادیوں کی روک تھام کیلئے شکایتی سیل بھی قائم کیے تھے۔ ایس ایس پی سونیا شمروز نے روزنامہ جنگ اور جیونیوز سےگفتگو کرتے ہوئے کہا کہ وہ اپنا ایوارڈ صنفی امتیاز کی متاثرہ خواتین اور محنتی خواتین پولیس آفیسرز کے نام کرتی ہیں۔ انہوں نے کہا کہ خواتین پولیس اہلکار امن و سلامتی کو یقینی بنانے کیلئے انتھک محنت کر رہی ہیں، کام کے دوران ثقافتی اصولوں اور حساسیت کو مدنظر رکھا اسی وجہ سے خواتین سے متعلق جرائم کی رپورٹنگ میں اضافہ ہوا ہے۔ ان کا کہنا تھا کہ بٹگرام میں خواتین رپورٹ درج کرنے پولیس اسٹیشن نہیں آتی تھیں، اب خواتین ہماری مدد لینے آتی ہیں،بلاشبہ خواتین پاکستان کی تعمیر و ترقی اور نیک نامی میں اپنا اہم کردار ادا کر رہی ہیں۔