فرمان الہی
نماز کے اوقات
نئی دہلی (اے ایف پی، مانیٹرنگ ڈیسک) افغانستان نے انڈیا میں اپنا سفارتخانہ بند کر دیا ہے۔ سفارتخانے کی جانب سے سوشل میڈیا پلیٹ فارم ایکس پر جاری اعلامیے میں کہا ہے کہ ’انتہائی دکھ، افسوس اور مایوسی کے ساتھ نیو دہلی میں افغانستان کا سفارتخانہ اپنے آپریشن ختم کرنے کے فیصلے کا اعلان کر رہا ہے۔‘ اعلامیے میں مزید کہا گیا کہ ’انڈیا نگران کی حیثیت سے سفارتخانے کا کنٹرول سنبھالے گا۔‘ سفارتخانے کی جانب سے جاری اعلامیے کے مطابق اسٹاف اور وسائل میں کمی کے باعث آپریشن جاری رکھنا انتہائی مشکل ہو رہا تھا جبکہ سفارتکاروں کے ویزا کی تجدید کے لیے بھی سپورٹ بروقت اور کافی نہیں تھی۔ انڈیا سمیت اکثر ممالک نے طالبان کی حکومت کو باضابطہ طور پر تسلیم نہیں کیا لیکن حکومتی سطح پر رابطے قائم رکھے ہوئے ہیں۔ اس سے پہلے یہ خبریں سامنے آئیں تھیں کہ حالیہ مہینوں میں سفیر اور دیگر اعلٰی حکام انڈیا چھوڑ چکے ہیں جبکہ پیچھے رہ جانے والوں کے درمیان لڑائی جھگڑے چلتے رہتے ہیں۔ تاہم اعلامیے میں واضح کیا گیا ہے کہ ’اندرونی لڑائی جھگڑوں سے متعلق بے بنیاد دعووں کی تردید کرتے ہیں‘ اور یہ بھی کہا ہے کہ کوئی بھی سفارتکار ’بحران کا فائدہ اٹھاتے ہوئے تیسرے ملک میں پناہ‘ لینے کی کوشش نہیں کر رہا۔طالبان کے اقتدار میں آنے کے فوری بعد انڈیا نے کابل میں اپنا سفارتخانہ اگست 2021 میں بند کر دیا تھا لیکن گزشتہ سال چند اہلکاروں کو واپس بھیجا تھا۔
