• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بالی ووڈ کی سدا بہار اداکارہ ممتاز کی کراچی میں سیر سپاٹے اور شاپنگ

آج کا اخبار
اہم خبریں
14 دسمبر ، 2023
کراچی( رپورٹ:اختر علی اختر)بالی ووڈ کی سدا بہار اداکارہ ممتاز نے کراچی میں ساحل کی سیر کی،خُوب انجوائے کیا، طارق روڈ اور کلفٹن پر بھرپور شاپنگ کی، اپنی بہن کو ساتھ رکھا، مداحوں نے پہچان لیا،ان کے ساتھ سیلفیاں بھی بنوائیں۔ اس موقع پر ان کا کہنا تھا کہ بچپن سے کراچی دیکھنے کی خواہش تھی جو کئی سال گزرنے کے بعد پُوری ہوئی۔ پاکستانی اداکارہ ماہرہ خان سے ملاقات اچھی رہی، ان کو شادی کی مبارک باد دی۔لاہور میں مولا جٹ کے ہیرو فواد خان اور راحت فتح علی خان سے ملوں گی۔ ماضی کی سپر اسٹارممتاز کا مزید کہنا تھا کہ ایک ہفتے تک کراچی میں قیام کروں گی۔ علاوہ ازیں انہوں نے’’جیو نیوز‘‘ کے مقبول پروگرام ’’جیو پاکستان‘‘ میں بطور مہمان شرکت کی۔ انہوں نے پروگرام میں گفتگو کرتے ہوئے کہا کہ میں بہت خوش نصیب ہوں کہ پاکستان اور بھارت دونوں طرف کے لوگ مجھ سے بے حد محبت کرتے ہیں۔ اپنی کامیابی کا سہرا اداکار راجیش کھنہ اور دلیپ کمار کے سر سجاتے ہوئے کہا کہ راجیش کھنہ کے ساتھ جتنی فلمیں کیں، وہ سب کامیاب ہوئیں۔ میں راجیش کھنہ اور دلیپ کمار کی مشکور ہوں کہ انہوں نے میرے ابتدائی دور میں میرے ساتھ کام کرنے پر رضا مندی ظاہر کی۔ اداکارہ ممتاز نے کہا کہ راجیش کھنہ کے ساتھ پہلی ہی فلم سے ہماری جوڑی کو بہت پسند کیا گیا۔ انہوں نے کہا کہ کوئی آرٹسٹ یہ نہیں کہہ سکتا کہ کون سا گانا کب ہٹ ہو گا، بہت خوش ہوں کہ میری تمام فلموں کے گانے بہت مقبول ہوئے، فنکارجب مداحوں سے پیار محبت سے بات کریں گے تو دنیا فتح کر لیں گے۔ ممتاز نے پاکستانی فنکاروں اور ڈراموں کے حوالے سے بھی گفتگو کی اور بتایا کہ انہیں پاکستانی ڈرامے دیکھنا پسند ہیں اور کئی ڈرامے دیکھے بھی ہیں۔ اداکاراحسن خان کی تعریف کرتے ہوئے کہا کہ ان کے ڈرامے دیکھے ہیں اور مجھے بہت اچھے لگے۔ بھارت میں کام کرنے والے پاکستانی اداکار فواد خان اور اداکارہ ماہرہ خان کے حوالے سے بات کرتے ہوئے انہوں نے کہا کہ فواد خان بہت نفیس شخصیت کے مالک ہیں، پاکستان آئی ہوں تو انہیں مزید جاننے کا موقع ملے گا، جبکہ ماہرہ خان بہت پیاری ہیں، وہ جب بھی ملتی ہیں بہت پیار و محبت سے ملتی ہیں۔ کراچی میں ان سے ملاقات بہت اچھی رہی۔
اہم خبریں سے مزید