• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

امریکہ میں ایک اور بھارت نژاد طالبعلم کی لاش برآمد، تعداد 4 ہوگئی

آج کا اخبار
یورپ سے
09 فروری ، 2024
واشنگٹن (نیوز ڈیسک) امریکہ میں بھارت نژاد طالب علم 23سالہ سمیر ایک پارک میں پراسرار طور پر مردہ حالت میں پایا گیا۔ عالمی خبر رساں ادارے کے مطابق امریکہ کی وارین کانٹی کورونر کے دفتر سے جاری بیان میں تصدیق کی گئی کہ انڈیانا کی پرڈیو یونیورسٹی سے پی ایچ ڈی کرنے والا بھارتی طالب علم کی لاش نیچر ریزرو پارک سے ملی ہے۔ بیان میں کہا گیا ہے کہ بھارت نژاد 23سالہ سمیر کامتھ نے اگست2023 میں مکینیکل انجینئرنگ میں ماسٹر ڈگری مکمل کی تھی اور 2025میں اپنا ڈاکٹریٹ پروگرام مکمل کرنے والا تھا۔ امریکی حکام کا کہنا تھا کہ لاش کو پوسٹ مارٹم کے لیے فرانزک لیب بھیجا گیا ہے جس کی رپورٹ کی روشنی میں تفتیش کو آگے بڑھایا جائے گا۔ یہ واقعہ پرڈیو یونیورسٹی میں ہی زیر تعلیم بھارت نژاد ایک اور طالب علم انیل اچاریہ کے مردہ پائے جانے کے چند دن بعد پیش آیا ہے۔ انیل اچاریہ کی لاش کیمپس گرائونڈ سے ملی تھی۔اسی طرح پچھلے ہفتے ہی ایک اور بھارتی طالب علم 19سالہ شریاس ریڈی ریاست اوہائیو میں پراسرار حالت میں مردہ پایا گیا تھا۔ایک اور واقعے میں ریاست جارجیا کی لیتھونیا یونی ورسٹی سے ایم بی اے کرنے والے بھارتی طالب علم وویک سینی 16جنوری کو ایک بے گھر شخص کے حملے میں ہلاک ہوگئے تھے۔اسی طرح ایک اور بھارتی طالب علم اکول دھون گزشتہ ماہ جنوری میں یونیورسٹی آف الینوائے اربانا کے باہر مردہ پایا گیا تھا۔
یورپ سے سے مزید