استخارہ والے عمل میں قلبی رجحان کے خلاف کرنا

آپ کے مسائل اور اُن کا حل

سوال: اگر کوئی شخص کسی کام کے لئے استخارہ کرے اور استخارہ میں کام نہ کرنے کی طرف اشارہ ہو، اس کے باوجود انسان وہ کام کرے اس کا کیا حکم ہے؟

جواب: واضح رہےکہ "استخارہ" کا مطلب ہے: کسی جائز معاملے میں خیراور بھلائی کا طلب کرنا، اورجب کسی جائز معاملے میں تردد ہو تواس کی بہتری والی جہت طلب کرنے کے لیے استخارہ کا مسنون عمل کیا جاتا ہے، اور استخارہ کی حقیقت یہ ہے کہ بندہ اللہ تعالیٰ سے خیر طلب کرتا ہے، یعنی یہ دعا کرتا ہے کہ جس کام میں میرے لیے خیر اور بہتری ہو، وہی کام میرے لیے مقدر فرما دیجیے، جو کام میرے لیے بہتر نہیں وہ مجھے کرنے ہی نہ دیجیے، یہ مسنون عمل ہے۔

لہٰذا استخارہ کرلینے کے بعد جس کام کی طرف رجحان ہو، وہی کام کرلینا چاہیے اور اسی میں اپنے لیے بھلائی اور بہتری سمجھنی چاہیے، اور جس طرف دل مطمئن نہیں تو وہ کام نہیں کرنا چاہیے، اس کے نہ کرنے میں دنیا اور آخرت کی خیر مضمر ہوگی، لہٰذا اگر استخارہ میں کسی کام کے نہ کرنے کی طرف اشارہ ہو تو اس کے باوجود اس کےخلاف کرنا شرعاً حرام یا ناجائز نہیں ہے، لیکن جب اللہ تعالیٰ کی طرف سے ایک اشارہ موجود ہے کہ اس کام میں خیر نہیں تو پھر استخارہ کے مطابق ہی عمل کیا جائے، اس کےخلاف کرنا بہتر نہیں ہے۔