PTI وفد کی فضل الرحمٰن سے ملاقات، بات چیت اچھی رہی، سربراہ JUI

اسلام آباد(این این آئی) سربراہ جے یو آئی مولانا فضل الرحمان نے کہا ہے کہ آئین کی کوئی حیثیت نہیں رہی، پارلیمنٹ کی اہمیت ختم ہو گئی، جمہوریت ہار رہی ہے۔پی ٹی آئی وفد کیساتھ مشترکہ پریس کانفرنس کرتے ہوئے مولانا فضل الرحمان نے کہا کہ عمر ایوب اور اسد قیصر تشریف لائے، انہیں خوش آمدید کہتے ہیں، ان سے بات چیت اچھی رہی ، اپوزیشن اتحاد میں شمولیت کیلئے ہمیں منانے کی کوشش کی جارہی ہے، حکومت مخالف تحریک کیلئے پی ٹی آئی سے گارنٹی چاہیے، جبکہ عمر ایوب اور اسد قیصر اس وقت غیرجمہوری قوتیں بیٹھی ہوئی ہیں، اللہ نے مولانا کو طاقت دی ہم اسے استعمال کرناچاہتے ہیں۔ مولانا فضل الرحمٰن نے کہا کہ اپوزیشن جماعتوں میں رابطے رہیں، سیاسی تعاون رہے، اس پر ہمارا کوئی اختلاف نہیں،تلخیوں کو دور کرنے کیلئے آج کے ماحول میں بات چیت ضروری ہے، اختلاف ختم نہیں کر سکتے تو رویوں کو نرم کر سکتے ہیں۔اپوزیشن لیڈر عمر ایوب نے کہاکہ مولانا فضل الرحمان نے کھلے دل سے ہمیں خوش آمدید کہا، ہمارا تعلق پرانا ہے، مفید گفتگو ہوئی، یہ بات چیت آئندہ بھی جاری رہے گی۔انہوں نے کہاکہ آئین اور قانون کی پاسداری کیلئے جدو جہد کر رہے ہیں، بانی پی ٹی آئی، محمود اچکزئی اور ہر محب وطن کی یہی خواہش ہے۔عمر ایوب نے کہاکہ ہمارے جلسے اور کنونشن پورے پاکستان میں ہوں گے، آج پاکستان میں آئین نام کی کوئی چیز ہے ہی نہیں، پی ٹی آئی سیکرٹریٹ پر پولیس حملے کی مذمت کرتے ہیں۔ انہوں نے کہا کہ اس وقت کہیں سے بھی سرمایہ کاری نہیں آرہی کیونکہ اس وقت ملک میں عدل و انصاف نہیں، جمہوریت پھلے پھولے گی تو سرمایہ کاری آئے گی۔