فرمان الہی
نماز کے اوقات
پاکستان شوبز انڈسٹری کی معروف ماڈل و اداکارہ صحیفہ جبار نے مظلوم فلسطینیوں پر جاری اسرائیلی جارحیت پر بالی ووڈ کی مشہور شخصیات کی خاموشی پر برہمی کا اظہار کیا ہے۔
صحیفہ جبار نے اپنی انسٹا اسٹوری میں لکھا کہ جب مغرب میں سب لوگ فلسطینیوں کی حالت زار کے بارے میں آواز نہ اٹھانے پر ہالی ووڈ کی مشہور شخصیات پر تنقید کر رہے ہیں اور اُنہیں بلاک کر رہے ہیں تو یہاں ہم بالی ووڈ کی مشہور شخصیات کے بارے میں کیا کر رہے ہیں؟
اُنہوں نے لکھا کہ ہمارا پڑوسی ملک، جہاں ہم کام کرنے کے خواہشمند ہیں، اور جہاں ہم اپنے انٹرویوز میں ان کی بہت تعریفیں کرتے ہیں، ان میں سے کسی نے بھی غزہ میں جاری فلسطینیوں کی نسل کشی کے خلاف بات نہیں کی۔
اداکارہ نے پاکستانی عوام سے مطالبہ کرتے ہوئے لکھا کہ براہ کرم، بالی ووڈ کی مشہور شخصیات کو ان کی سالگرہ پر مبارکبادیں دینا اور اُنہیں اہمیت دینا چھوڑ دیں۔
اُنہوں نے مزید لکھا کہ ان کی حکومت ہمارے فنکاروں کے بھارت میں کام کرنے پر پابندی لگا چکی ہے اور ویسے بھی پچھلے چند سالوں میں ہمیں بھارت سے چند ہی اچھے پروجیکٹس کی پیشکش موصول ہوئی ہے اور اب جب غزہ میں فلسطینیوں کی نسل کشی جاری ہے تو پورا بھارت خاموش ہے۔
صحیفہ جبار نے لکھا کہ یہ وقت ہے کہ ہم اپنے کام پر توجہ دیں، بہتر فلمیں و ڈرامے بنائیں اور اپنے کام کی بھارت سے یا کسی سے بھی توثیق کروانا چھوڑ دیں۔
واضح رہے کہ غزہ میں 7 اکتوبر سے جاری اسرائیلی جارحیت کے خلاف اب تک صرف چند ہی بھارتی اداکاروں نے آواز اُٹھائی ہے۔
واضح رہے کہ غزہ میں جاری اسرائیلی بربریت کے خلاف خاموشی اختیار کرنے والی معروف شوبز شخصیات سمیت مشہور لوگوں کو اَن فالو کرکے ان کا بائیکاٹ کیا جارہا ہے۔
بلاک آؤٹ مہم کا آغاز 6 مئی کو میٹ گالا کے بعد شروع ہوا جس کا مقصد مشہور شخصیات کو انسٹاگرام، ایکس اور ٹک ٹاک جیسے آمدنی کا ذریعہ بننے والے سوشل میڈیا نیٹ ورکس سے بلاک کرنا ہے۔
اس مہم کا مقصد سوشل میڈیا پلیٹ فارمز پر اشتہارات کے ذریعے مشہور شخصیات کی کمائی کو کم کرنا ہے۔ صارفین کا خیال ہے کہ لوگوں کی جانب سے مشہور شخصیات کی پوسٹ کو لائک اور دیکھنے میں کمی سے ان کی کمائی پر اثر پڑے گا۔
واضح رہے کہ اس مہم کے نتیجے میں کم کارڈیشین ، ٹیلر سوئفٹ، بیونس، کائلی جینر، زینڈایا، مائلی سائرس، سیلینا گومز، آریانا گرانڈے، ڈیمی لوواٹو، کانیے ویسٹ، کیٹی پیری، زیک ایفرون، نک جونس سمیت دیگر مغربی دنیا کی مقبول شخصیات نے مختصر عرصے میں لاکھوں صارفین کھو دیئے ہیں۔
