ایم کیو ایم نے سندھ بجٹ مسترد کردیا، وفاقی پر تحفظات

کراچی(اسٹاف رپورٹر)ایم کیو ایم کے مرکز بہادرآباد میں چیئرمین ڈاکٹر خالد مقبول صدیقی کی سربراہی میں مرکزی کمیٹی کا اجلاس ہوا جس میں شرکاء نے سندھ کے بجٹ کو مسترد کردیا جبکہ وفاقی بجٹ پر تحفظات کا اظہار کیا، اور اسے شہری سندھ دشمن بجٹ قرار دیا گیا، اجلاس میں کہا گیا کہ سندھ کی متعصب حکومت نے بجٹ میں شہری سندھ کیلئے کوئی بڑا ترقیاتی منصوبہ اور شہری نوجوانوں کیلئے کوئی اسکیم نہیں رکھی،کراچی سندھ کے بجٹ کا 97 فیصد پیسہ دیتا ہے اس کے باوجود کراچی کی ترقی، انفراسٹرکچر اور شہریوں کو نظرانداز کیا گیا، مرکزی کمیٹی نے وفاقی بجٹ پر بھی شدید تحفظات کا اظہار کرتے ہوئے کہا کہ وفاقی بجٹ میں تنخواہ دار طبقے پر اِنکم ٹیکس کے اضافی بوجھ پر تشویش ہے، تنخواہ دار طبقے پر ٹیکس بڑھانا ملک کے بڑے جاگیردار، سرمایہ دار اور وڈیروں کو تحفظ فراہم کرنے کے مترادف ہے،وزیراعظم پاکستان تنخواہ دار طبقے پر اِنکم ٹیکس کا بوجھ کم کرنے اور انکا معاشی قتل عام بند کرنے کی ہدایت جاری کریں۔