فرمان الہی
نماز کے اوقات
لندن (جنگ نیوز) سینیٹ آف پاکستان کے چیئرمین سید یوسف رضا گیلانی نے کہا ہے کہ پاکستان برطانیہ کے ساتھ اپنے دو طرفہ تعلقات کو بہت اہمیت دیتا ہے اور ان تعلقات کو باہمی فائدے کے لیے نئی بلندیوں تک لے جانا چاہتا ہے۔ چیئرمین سینیٹ نے ان خیالات کا اظہار اپنے دورہ برطانیہ کے دوران ہاؤس آف کامنز کے اسپیکر ایچ ای لوندسے ایک ملاقات میں کیا ہے۔ چیئرمین سینیٹ، سینیٹرز کے وفد کے ہمراہ، مختلف شعبوں میں دو طرفہ، کثیر الجہتی اور ادارہ جاتی تعاون کو مضبوط بنانے کے مواقع تلاش کرنے کے لیے برطانیہ کا دورہ کر رہے ہیں۔ چیئرمین سینیٹ کے ہمراہ سینیٹرز آغا شہ زیب درانی، مسٹر فیصل سلیم رحمٰن، مسٹر اشرف علی جتوئی اور قومی اسمبلی کے اراکین، سید عبدالقادر گیلانی اور سید قاسم علی گیلانی بھی موجودہیں۔ ملاقات کے دوران اپنے ابتدائی کلمات میں چیئرمین سینیٹ نے دونوں ممالک کے درمیان تاریخی اور ثقافتی تعلقات کو اجاگر کیا اور کہا کہ ان تاریخی تعلقات نے سیاسی، سفارتی، اقتصادی تعلقات اور عوامی روابط کو گہرا کرنے کی راہ ہموار کی ہے۔ انہوں نے مزید کہا کہ پاکستانی برادری نے ان تعلقات کو مزید مضبوط بنایا ہے، جو پاکستان اور برطانیہ کے درمیان ایک پل کا کردار ادا کر رہی ہے، اور اس طرح ایک متحرک اور خوشحال شراکت داری کی ٹھوس بنیاد فراہم کر رہی ہے۔ چیئرمین سینیٹ نے مزید کہا کہ ہماری تاریخی وراثت، مشترکہ اقدار اور باہمی خیرسگالی پاکستان اور برطانیہ کے درمیان مضبوط شراکت داری کے اجزاء ہیں۔ چیئرمین سینیٹ نے پارلیمانی تعاون کی وسیع اہمیت کو بھی تسلیم کیا اور کہا کہ پاکستان پارلیمانی سفارت کاری کو بہت اہمیت دیتا ہے۔ انہوں نے کہا کہ جمہوری تجربات کا تبادلہ اور جمہوری اقدار کی تعلیم کامن ویلتھ کے طور پر قوموں کے خاندان کیلئے مرکزی حیثیت رکھتے ہیں۔ پاکستان اور برطانیہ کامن ویلتھ سطح پر بہترین تعاون سے لطف اندوز ہورہے ہیں۔
