فرمان الہی
نماز کے اوقات
اسلام آباد (ایجنسیاں)چیئرمین پیپلز پارٹی بلاول بھٹو زرداری نے جمعیت علمائے اسلام کے سربراہ مولانا فضل الرحمان کو یقین دہانی کرائی ہے کہ وہ مدارس رجسٹریشن بل پر دستخط سے متعلق حکومت سے بات کر یں گے۔بدھ کو بلاول بھٹو نے وفد کے ہمراہ فضل الرحمان سے اسلام آباد میں ان کی رہائشگاہ پر ملاقات کی ‘اس دوران اہم سیاسی امور اورمدارس رجسٹریشن ایکٹ پر صدر مملکت کے دستخط نہ ہونے کے حوالے سے گفتگو ہوئی۔ ملاقات میں ملک کی سیاسی صورتحال پر بھی تبادلہ خیال کیا گیا ۔فضل الرحمان نے مدارس رجسٹریشن بل پر دستخط نہ ہونے پر تشویش کا اظہار کیا اور کہا کہ بل پر دونوں ایوانوں سے منظوری کے باوجود صدر کے دستخط کیوں نہیں ہوئے۔ملاقات کے بعد میڈیا سے گفتگو کرتے ہوئے جے یوآئی کے سینیٹر کامران مرتضی کا کہنا تھاکہ صدر کسی سیاسی جماعت کا نہیں ریاست کا صدر ہوتا ہے، مدارس کی رجسٹریشن پر بلاول بھٹوزرداری پہلے بھی ہمارے ساتھ تھے اب بھی ہمارے ساتھ ہیں۔ پیپلز پارٹی نے یقین دہانی کرا دی ہے کہ صدر مدارس کی رجسٹریشن کے بل پر دستخط کر دیں گے۔ملاقات میں مولانا عبدالغفور حیدری، سینیٹر کامران مرتضٰی، حاجی غلام علی ، مولانا لطف الرحمان، مولانا اسعد محمود، راجہ پرویز اشرف اور قمر زمان کائرہ بھی موجود تھے۔
