• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سپرلیگ 10، وارنر، خواجہ، شکیب، ساؤتھی، ہیلز پلاٹینم کیٹگری میں، ڈرافٹ کا مقام اور تاریخ تبدیل

کراچی (اسٹاف رپورٹر) پاکستان سپر لیگ کے دسویں ایڈیشن کے ڈرافٹ کیلئے غیر ملکی کھلاڑیوں کی کیٹیگریز سامنے آگئی ہیں ۔ دوسری جانب پی سی بی نے ڈرافٹنگ تقریب کی تاریخ اور وینیو گوادر سے بدل لاہور کردیا ہے۔ آئندہ ماہ ہونے والے ٹورنامنٹ سے قبل ڈرافٹ کیلئے آسٹریلیا کے ڈیوڈ وارنر ، میتھیو شارٹ ، شان ایبٹ ، کرس لین ، عثمان خواجہ، بنگلادیش کے مستفیض الرحمان، مجیب الرحمان، شکیب الحسن، نیوزی لینڈ کے مارک چیپمین، ڈیرل مچل، ایڈم ملن، ٹم ساؤتھی، مائیکل بریسویل، سری لنکن کرکٹر کوشال مینڈس، انگلینڈ کے ڈیوڈ ویلی، زیک کرالی، جیسن رائے اور ایلیکس ہیلزپلاٹینم کیٹیگری میں شامل ہیں۔ پلاٹینم کیٹیگری میں 40 غیر ملکی کھلاڑی شامل ہیں جب کہ 6 غیر ملکی کھلاڑی صرف پلاٹینم کیٹیگری میں ہی منتخب ہونے کیلئے دستیاب ہیں۔ دیگر کھلاڑی پلاٹینم میں منتخب نہ ہونے کے بعد ڈائمنڈ اور گولڈ میں بھی دستیاب ہیں جب کہ آسٹریلیا کے وکٹ کیپر بیٹر ایلیکس کیری ڈائمنڈ کیٹیگری کا حصہ ہیں۔ ڈائمنڈ کیٹیگری میں 87 غیر ملکی کھلاڑی پی ایس ایل ڈرافٹ کیلئے دستیاب ہیں، گولڈ کیٹیگری میں 165 غیر ملکی کھلاڑی پی ایس ایل 10 ڈرافٹ کیلئے رجسٹر ہو ئے ہیں۔ دریں اثنا پاکستان کرکٹ بورڈ نے پاکستان سپر لیگ ڈرافٹ کوگوادر سے لاہور منتقل کردیا ہےاب یہ تقریب گیارہ کے بجائے 13جنوری کو ہوگی۔پی سی بی نے منگل کو اعلان کیا کہ پی ایس ایل پلیئر ڈرافٹ کی تقریب 13 جنوری کو حضوری باغ لاہور قلعہ دوپہر بارہ بجے سے ہوگی۔ لاجسٹک چیلنجز کے سبب اسے گوادر سے لاہورمنتقل کر دیا گیا ہے۔ مارچ میں ہونے والے پی ایس ایل ٹرافی ٹور کے روٹ میں گوادر ایک اہم مقام کے طور پر شامل ہوگا۔ پی ایس ایل کا تاریخی 10 واں ایڈیشن اس سال 8 اپریل سے 19 مئی کے درمیان منعقد ہوگا۔ چھ فرنچائزز پیر 13 جنوری کو لاہور کے سب سے مشہور ورثے والے مقام پر پلیئر ڈرافٹ کی تقریب کے دوران اپنے اسٹارز پر مشتمل اسکواڈز کا انتخاب کریں گی۔

اسپورٹس سے مزید