فرمان الہی
نماز کے اوقات
معروف بھارتی فلم ساز پریا درشن نے اپنی سالگرہ کے موقع پر اکشے کمار، سنیل شیٹھی اور پاریش راول کے ہمراہ مشہور کامیڈی فلم ہیرا پھیری کی اگلی فلم کے حوالے سے گفتگو بھی کی۔
بھارتی میڈیا کے مطابق بالی وڈ اسٹار اکشے کمار نے فلم ساز پریا درشن کو اُن کی سالگرہ پر مبارک باد کا ٹوئٹ کیا، جس کے جواب میں پروڈیوسر پریا درشن نے ٹوئٹ میں کہا ہے کہ میری سالگرہ پر مبارک باد دینے کا شکریہ، میں اپنی سالگرہ کے موقع پر آپ (اکشے کمار)، سنیل شیٹھی اور پاریش راول جی کے لیے ایک تحفے کا اعلان کرنا چاہتا ہوں، میں ہیرا پھیری 3 بنانے جا رہا ہوں، کیا آپ لوگ تیار ہیں؟
سنیل شیٹھی کی جانب سے ٹوئٹ آیا ہے کہ ہیرا پھیری اور پوچھ پوچھ، اس کو شروع کریں، پریا درشن نے اس کی تصدیق کی ہے کہ یہ فلم ابھی اپنے پِری پروڈکشن فیز میں ہے۔
ابھی ٹوئٹس کا سلسلہ جاری ہی تھا کہ ہیرا پھیری 1 میں کبیرا کا کردار ادا کرنے والے معروف بالی ووڈ ولن گلشن گروور بھی گفتگو کا حصہ بن گئے جنہوں نے سنیل شیٹھی کو ٹیگ کر کے کہا کہ میرے بھائی کبیرا کو ٹیگ نہیں کیا آپ نے، کیا کبیرا کے بغیر ہیرا پھیری 3 بنے گی؟
اکشے کمار نے کہا ہے کہ پریا درشن نے اس سالگرہ پر زندگی کا بہترین تحفہ دیا ہے، جب انہوں نے فلم ہیرا پھیری 3 کا حصہ بننے کی تصدیق کی ہے۔
فلم اسٹار پاریش راول نے بھی پریا درشن کو سالگرہ پر مبارک باد کا پیغام بھیجا اور کہا ہے کہ آپ ہی اس خوشیوں کی گٹھڑی کو لائے تھے، اس کا خیال رکھنے کے لیے شکریہ کرتا ہوں۔
اکشے کمار پریا درشن کے کئی ہٹ پروجیکٹس میں کام کر چکے ہیں اور اب بھی ان کی فلم بھوت بنگلہ میں اہم کردار میں نظر آئیں گے۔
