فرمان الہی
نماز کے اوقات
کراچی (عبدالماجدبھٹی) سہ فریقی ٹورنامنٹ اور آئی سی سی چیمپئنز ٹرافی میں فخر زمان کے ساتھ پاکستانی اننگز کا آغاز تجربہ کار بابر اعظم کریں گے۔ قومی ٹیم انتظامیہ نے انہیں وہ کردار ادا کے لئے کہا ہے جو بھارتی ٹیم میں سچن ٹنڈولکر ادا کرتے تھے۔ بابر اعظم نے اس مشکل مشن کیلئے آمادگی ظاہر کی ہے۔ پاکستان نے جس پندرہ رکنی ٹیم کا اعلان کیا ہے اس میں واحد ریگولر اوپنر فخر زمان ہیں، سلیکٹر اسد شفیق نے کہا ہے کہ دوسرے اوپنر کا فیصلہ میچ سے قبل کیا جائے گا۔ ٹیم انتظامیہ کے حددرجہ مصدقہ ذرائع نے تصدیق کی ہے کہ کیپ ٹاون ٹیسٹ میں جب صائم ایوب کے ٹخنے پر چوٹ لگی اسی وقت عاقب جاوید اور دیگر کوچز کو اندازہ تھا کہ وہ دو سے ڈھائی ماہ میں فٹ ہوسکیں گے۔ اس لئے محمد رضوان ، عاقب جاوید، بیٹنگ کوچ شاہد اسلم اور سلیکٹرز نے بابر اعظم سے کئی نشستیں کیں اور انہیں قائل کیا گیا کہ وہ ٹیسٹ اور ون ڈے میں اننگز اوپن کریں گے۔ خیال رہے کہ سچن کا ٹیسٹ ڈیبیو1989میں کراچی میں ہوا لیکن1994-95 میں سچن ٹنڈولکر اوپنر بن گئے اور اس دوران وہ ون ڈے کرکٹ میں بھارتی فتوحات کے مرکزی کردار رہے۔ ذرائع کا کہنا ہے کہ بابر اعظم سے کہا گیا ہے کہ وہ ون ڈے اننگز میں تمام اوورز کھیلنے کی کوشش کریں۔ بابر اعظم ون ڈے میچوں خاص طور پر سہ فریقی ٹورنامنٹ اور چیمپئنز ٹرافی میں اوپننگ کیلئے رضامند ہوگئے ہیں۔30سالہ بابر اعظم نے سے123ون ڈے انٹر نیشنل میں19 سنچریوں اور23نصف سنچریوں کی مدد سے5957 رنز56کی اوسط سے بنائے ہیں۔ وہ 2015میں انگلینڈ کے خلاف دو ون ڈے میچوں میں اوپن کرچکے ہیں لیکن انہوں نے زیادہ تر ون ڈے میچ تیسرے اور چوتھے نمبر پر کھیلے ہیں۔ حالیہ سالوں میں بابر اعظم ون ڈائون پر بیٹنگ کرتے تھے۔
