فرمان الہی
نماز کے اوقات
اسلام آباد، پشاور، لاہور (ایجنسیاں، مانیٹرنگ ڈیسک،نمائندہ جنگ)خیبر پختونخوا میں سیکورٹی فورسز نےدو الگ الگ کارروائیوں میں 15 خوارجی دہشت گرد ہلاک کردیئے،لیفٹیننٹ سمیت 4جوان شہید ہوگئے،صدرمملکت ،وزیر اعظم نے فورسز کو خراج تحسین پیش کیا۔شمالی وزیر ستان دہشتگردوں سے جھڑ پ میں شہادت پانیوالوں میں لیفٹیننٹ حسان اشرف،نائب صوبیدار محمد بلال،2سپاہی فرحت اللہ،ہمت خان شامل ہیں۔ڈیرہ اسماعیل خان میں سکیورٹی فورسز کا دوسرے روز بھی آپریشن ،انتہائی مطلوب رنگ لیڈر فرمان عرف ثاقب سمیت مزید 9دہشگرد مارے گئے۔آئی ایس پی آر کی جانب سے جاری بیان کے مطابق ضلع ڈیرہ اسماعیل خان کے علاقے ہتھالہ میں انٹیلی جنس کی بنیاد پر آپریشن کیا گیاجہاں خوارج کی موجودگی کی اطلاع ملی تھی۔بیان کے مطابق دورانِ آپریشن، سیکیورٹی فورسز نے خوارج کے ٹھکانے کو مؤثر انداز میں نشانہ بنایا۔ترجمان پاک فوج کے مطابق مارے جانے والوں میں خارجی رِنگ لیڈر فرمان عرف ثاقب، خارجی امان اللہ عرف توری، خارجی سعید عرف لیاقت خارجی بلال شامل ہیں۔بیان کے مطابق یہ تمام دہشت گرد علاقے میں متعدد تخریبی سرگرمیوں میں ملوث اور قانون نافذ کرنے والے اداروں کو مطلوب تھے، ایک اور کارروائی میں، شمالی وزیرستان کے علاقے میران شاہ میں سیکیورٹی فورسز نے 6 خوارج کو مؤثر طریقے سے جہنم واصل کر دیا۔آئی ایس پی آر کے مطابق دہشت گردوں کے خلاف اس کارروائی میں شدید فائرنگ کے تبادلے کے دوران لیفٹیننٹ محمد حسان اشرف(عمر 21 سال، رہائشی ضلع لاہور) نے بہادری سے دشمن کا مقابلہ کرتے ہوئے جامِ شہادت نوش کیا،ان کے ساتھ تین جوانوں نے بھی مادرِ وطن پر اپنی جان نچھاور کر دی۔صدر مملکت اور وزیرِ اعظم شہباز شریف نے خیبر پختونخوا میں فتنہ الخوارج کے خلاف کامیاب آپریشن پر سیکیورٹی فورسز کے افسران و اہلکاروں کی پزیرائی کی۔اپنے بیان میں وزیرِ اعظم نے آپریشنز کے دوران بہادری سے لڑتے ہوئے جام شہادت نوش کرنے والے لیفٹیننٹ محمد حسان اشرف، نائب صوبیدار محمد بلال، سپاہی فرحت اللہ اور سپاہی ہمت خان کو خراج عقیدت کیا۔انہوں نے کہا کہ مجھ سمیت پوری قوم کو اپنے شہداء اور ان کے اہل خانہ پر فخر ہے، دہشتگردی کے ملک سے مکمل خاتمے تک اس کے خلاف جنگ جاری رکھیں گے. دہشتگردوں کے ملک کے امن کو خراب کرنے کے ناپاک عزائم کو کبھی کامیاب نہیں ہونے دیں گے.صدر مملکت آصف علی زرداری نے انٹیلیجنس پر مبنی کاروائی کے دوران فتنۃ الخوارج کے دہشت گردوں کا قلع قمع کرنے پر سکیورٹی فورسز کی بہادری کو سراہا اورصدر مملکت کا کارروائی کے دوران جامِ شہادت نوش کرنے والے لیفٹننٹ محمد حسان اشرف شہید سمیت 4 جوانوں کو خراجِ عقیدت پیش کیا۔صدر مملکت نے کہا کہ قوم اپنے بہادر شہداء کی قربانیوں کو ہمیشہ یاد رکھے گی۔
