• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جی ڈی اے کی بلاول کو کینال منصوبے کیخلاف احتجاج میں شرکت کی دعوت

آج کا اخبار
اہم خبریں
17 مارچ ، 2025
کراچی(اسٹاف رپورٹر) جی ڈی اے کے چیف کوآرڈینیٹر سید صدرالدین شاہ راشدی نے بلاول بھٹو زرداری کو چھ نئی کینالز کے خلاف جاری تحریک میں شمولیت کی دعوت دیتے ہوئے کہا ہے کہ بلاول بھٹو زرداری کو اپنے والد سے کچھ حاصل نہیں ہوگا بلاول کو جو ملنا ہے وہ ہمارے پاس سے ملے گا، سندھ بچایو تحریک نے قومی اسمبلی کے حلقہ این اے 213عمر کوٹ کے ضمنی الیکشن کے لیے اپنے مشترکہ امیدوار کا اعلان کردیا، لال مالہی ان جماعتوں کے مشترکہ امیدوار ہونگے، وہ اتوار کوفنکشنل ہاؤس کلفٹن میں اتحادی جماعتوں کے اجلاس کے بعد میڈیا سے گفتگو کررہے تھے اس موقع پر پی ٹی آئی کے حلیم عادل شیخ، غلام مرتضی جتوئی، سردار عبدالرحیم، لال مالہی و دیگر نے بھی خطاب کیا۔ سید صدرالدین شاہ راشدی نے کہا کہ ملک میں ماحول اتنا سنگین اور بے یقینی ہے کہ سندھ ایک طرف اور کھوٹے سکے ایک طرف ہیں سندھ کے عوام کھوٹے سکوں کو کہیں قبول نہیں کریں گے کھوٹے سکوں کو انکی اصل جگہ بھیجا جائیگا انہوں نے کہا کہ مرتضی جتوئی رہا ہوکر آگیے ہیں یہ باعزت رہا ہوئے ہیں عوام میں انکی مقبولیت میں مزید اضافہ ہوا ہے انہوں نے بناء کسی قصور کے جیل کاٹی ہم عوام کے ساتھ کھڑے ہیں ہم منزل ضرور حاصل کریں گے صدرالدین شاہ راشدی نے کہا کہ سندھ کا پانی فروخت کرنے والوں نے پاکستان کھپے کا ایک نعرہ لگایا تھا جس کا مقصد پاکستان کو نیلام کرنا تھا عوام جانتے ہیں وہ پاکستان کو بیچنے نکلے ہیں اور ہم پاکستان بچانے نکلے ہیں ،صدرالدین شاہ راشدی نے کہا کہ بلاول بھٹو زرداری دریائے سندھ پر چھ نئی کینالز کے خلاف ہماری جاری تحریک میں شامل ہو جائے کیونکہ انکے والد نے تو سندھ کے پانی کا سودا کردیا ہے بلاول کو اپنے والد سے کچھ نہیں ملے گا انہیں جو ملنا ہے وہ ہمارے پاس سے ملے گا میرے والد مرحوم نے بھی بلاول کے لیے کہا تھا کہ ایک دن یہ ہمارا حصہ ہوگا کیونکہ جو بلاول کے والد کے کرتوت ہیں اس لحاظ سے بلاول جلد ہمارے ساتھ ہوگا۔ عوامی مینڈیٹ کو تسلیم کیے بغیر بلوچستان کا مسئلہ حل نہیں ہو سکتا، مذاکرات کرکے مسائل کو حل کریں ریاست کو چلانا ہے تو بیٹھ کر مسائل حل کریں، مجھے سمجھ نہیں آتا کہ بلوچستان کے مسئلے پر کیوں مذاکرات نہیں کیے جارہے، جو سونا مانگ رہا ہے اس پر ڈنڈے برسائے جارہے ہیں جو وسائل کی بات کررہا ہے اسے پر بھی ڈنڈے برسائے جارہے ہیں، آپکے تھنک ٹینک تھک چکے ہیں اب تھنک ٹینک کی جگہ خالی ٹنکیوں نے لے لی ہے ان خالی ٹنکیوں کو تبدیل کرنا پڑیگا، یہ صرف تاجر ہیں انہیں اپنی تجارت کے علاوہ کسی سے کوئی دلچسپی نہیں ہے اور جب ملک تاجروں کے ہاتھ میں دو گے تو نقصان تو ہوگا یہ ملک کو نچوڑ کر کھا رہے ہیں یہ جان لیں کفن میں جیب نہیں ہوتی سب یہیں رہ جائیگا۔ ہم ہر اس جماعت کے ساتھ ہیں جو پاکستان کے ساتھ ہے۔ ملکی معیشت گراوٹ کا شکار ہے ، پیپلزپارٹی نے اپنی حکومت میں کالا باغ ڈیم کی تعمیر کے لیے بجٹ میں رقم مختص کی، انہوں نے کل بھی سندھ کے پانی پر ڈاکہ ڈالا اور آج بھی ہمارے پانی کا سودا کررہے ہیں۔ جی ڈی اے رہنما غلام مرتضی جتوئی نے کہا کہ مجھ پر بکری چوری، پولیس مقابلہ کر انے جیسے جھوٹے الزامات کےمقدمات قائم کیے گیے مجھ پر الزام لگایا گیا کہ 12 جتوئی خاندان کے لوگ اور ڈھائی سو پولیس والے تھے جن کے درمیان مقابلہ کر ایا اور حیرت انگیز طور پر اس مقابلے میں کچھ نہیں ہوا، کوئی زخمی نہیں ہوا میں جب وفاقی وزیر تھا اس وقت ہماری زمینوں پر قبضے کیے گیے، حملے کروائے گیے ہم نے اپنی زمینیں بعد میں واگزار کروائی زمینوں کے معاملہ پرانے چل رہے ہیں، پی ٹی آئی کے حلیم عادل شیخ نے کہا کہ چھ نئی کینالز پر تحریک انصاف کا موقف سب کو معلوم ہے ڈاکٹر عارف علوی نے بحیثیت صدر دستخط نہیں کیے تھے ہم سندھ اور دریاے سندھ کو بچانے نکلے ہیں پیپلزپارٹی قابض رہی تو نہ ہمارے اسپتال نہ دریا نہ اسکول بچیں گے ایک طرف کینالز کا سودا کرنے والے تو دوسری طرف سندھ کے حلالی بیٹے کھڑے ہیں، جی ڈی اے کے سردارعبدالرحیم نے کہا کہ لال مالہی مور کوٹ سے منتخب ہونے کے بعد دریائے سندھ پر چھ نئی کینالز کے خلاف قرارداد قومی اسمبلی لائیں گے۔
اہم خبریں سے مزید