فرمان الہی
نماز کے اوقات
آسکر ایوارڈ یافتہ دستاویزی فلم ’نو ادر لینڈ‘ کے فلسطینی شریک ہدایت کار حمدان بلال کو اسرائیلی فوج نے حملے کے بعد گرفتار کر لیا۔
غیر ملکی میڈیا رپورٹس کے مطابق حال ہی میں اسرائیلی اور فلسطینی فلم سازوں کے تعاون سے بنائی گئی فلم ’نو ادر لینڈ‘ کو آسکر سے نوازا گیا تھا۔
فلم کے شریک ڈائریکٹر یوول ابراہم نے سماجی رابطے کی ویب سائٹ ایکس پر پوسٹ شیئر کر کے اس حوالے سے اطلاع دی ہے۔
ان کا کہنا ہے کہ اسرائیلی آباد کاروں کے ایک گروپ نے ہماری فلم نو ادر لینڈ کے شریک ڈائریکٹر حمدان بلال کو شدید تشدت کا نشانہ بنایا ہے، جس کے نتیجے میں ان کے سر اور پیٹ میں چوٹیں آئی ہیں، خون بہہ رہا تھا، اسرائیلی فورسز نے اس ایمبولینس پر بھی حملہ کیا جو اس نے بلائی تھی اور انہیں گرفتار کرکے لے گئے ہیں اور اس کے بعد سے وہ لاپتہ ہیں۔
انہوں نے واضح کیا ہے کہ حمدان بلال کو پولیس اسٹیشن میں رکھا گیا ہے اور انہیں اپنے وکیل سے بات کرنے کی اجازت نہیں ہے، اس لیے ہم ان کے بارے میں مزید نہیں جانتے۔
قبضے کے خلاف کام کرنے والی غیر سرکاری تنظیم سینٹر فار جیوش نان وائلنس کے مطابق یہ واقعہ مغربی کنارے کے جنوبی گاؤں سوسیا میں پیش آیا ہے۔
اسرائیلی فوج کا کہنا ہے کہ اس واقعے کا جائزہ لے رہے ہیں، فوری طور پر کوئی تبصرہ نہیں کر سکتے۔
