ملتان (سٹاف رپورٹر) وفاقی حکومت کی جانب سے یوٹیلٹی سٹور کارپوریشن کے پانچ ہزار سے زائد ڈیلی ویجز اور کنٹریکٹ ملازمین کو ملازمت سے فارغ کرنے کےخلاف ملک بھر کی طرح ملتان میں بھی احتجاجی مظاہرہ کیا گیا، ریجن بھر کے تمام یوٹیلٹی سٹورز اور ویئر ہائوسز کو غیر معینہ مدت کے لیے بند کر دیا گیا،دفاتر میں ملازمین نے قلم چھوڑ ہڑتال کی،مظاہرے کی قیادت نیشنل ورکرز یونین اور ورکرز الائنس کے عہدیداروں نے کی،تمام ملازمین سٹورز کی تالا بندی کرکے ریجن آفس ملتان میں اکٹھے ہوئے اور حکومت کے بے حسی پر مبنی اقدام کے خلاف احتجاجی مظاہرہ کیا اور شدید نعرے بازی کی، اس موقع پر سی بی اے کے سرپرست اعلیٰ اسرار فرید چشتی، رانا عبدالحکیم، حمید گل، رانا اظہار، منظور احمد، نوید گیلانی اور عبدالرحمن سمیت ملازمین کی بڑی تعداد موجود تھی،احتجاجی ملازمین نے بینرز اٹھا رکھے تھے جنپر مختلف مطالبات اور نعرے درج تھے، ملازمین کا کہنا تھا کہ یوٹیلٹی سٹور کارپوریشن نے یک جنبش قلم ساڑھے پانچ ہزار ڈیلی ویجز اور کنٹریکٹ ملازمین کو ملازمت سے فارغ کر دیا ہے، یہ حکومتی اقدام ملازمین کا معاشی قتل کرنے کے مترادف ہے، ملازمین کا مزید کہنا تھا کہ گزشتہ چار سالوں سے ان کی تنخواہوں میں کوئی اضافہ نہیں کیا گیا اور اب بغیر کسی معاوضہ کے ملازمت سے نکال دیا گیا ہے، مظاہرے سے خطاب کرتے ہوئے سرپرست اعلیٰ نیشنل ورکرز یونین ( سی بی اے) اسرار فرید چشتی کا کہنا تھا کہ ہم اس حکومت ظالمانہ سلوک کی مذمت کرتے ہیں اور اس کے خلاف ہر قانونی فورم پہ اواز اٹھائی جائے گی،انہوں نے مزید کہا کہ جب تک حکومت ان ملازمین کے لیے معاوضہ پیکیج کا اعلان نہیں کرتی، اس وقت تک ملک بھر میں ملازمین مکمل ہڑتال جاری رکھیں گے۔
فرمان الہی
نماز کے اوقات
