• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جنگ ہتھیاروں سے نہیں جذبوں سے لڑی جاتی ہے، تحریک نفاذ فقہ جعفریہ

میرا شہر
اسلام آباد
05 مئی ، 2025
اسلام آباد ( خصوصی نامہ نگار ، اپنے نامہ نگار سے) سربراہ تحریک نفاذ فقہ جعفریہ پاکستان علامہ آغا سید حسین مقدسی کی کال پر اتوار کو پورے ملک میں یوم عزم دفاع پاکستان ملی جوش و جذبے اور اس عزم کی تجدید کے ساتھ منایا گیا کہ پاک سرزمین کی حفاظت کے لیے محب وطن عوام سیسہ پلائی ہوئی دیوار بن کر ازلی دشمن کے مذموم ارادوں اور شیطانی حرکات کو ناکام بنا دیں گے۔ قوم سینے پر نشان حیدر سجانے والے سپوتوں کی پشت پر کھڑی ہے۔جنگ ہتھیاروں سے نہیں جذبوں سے لڑی جاتی ہے۔اس موقع پر تمام چھوٹے بڑے شہروں اور قصبوں میں ریلیاں نکالی گئی اور مساجد امام بارگاہوں میں وطن عزیز پاکستان کی سلامتی و استحکام کیلئے خصوصی دعائیں کی گئیں ۔ ٹی این ایف جے فیڈرل کیپیٹل کے زیر اہتمام نیشنل پریس کلب اسلام اباد سے نکالی گئی ریلی کی قیادت فرزند علی شاہ کاظمی، راجہ بشارت حسین امامی، ذوالفقار علی راجہ، فخر عباس عابدی، شوکت عباس جعفری، ملک فخر علی، اور دیگر نے ریلی میں خصوصی شرکت کی ۔ ریلی کے شرکاء نے پرجوش انداز میں پاک فوج زندہ باد ، پاکستان پائندہ باد ، بھارت و اسرائیل مردہ باد اور مادر وطن کی سرحدوں کے تحفظ اور عساکر پاکستان سے اظہار یکجہتی کے لیے نعرے لگائے۔ ریلی نے چائنہ چوک میں جلسے کی شکل اختیار کر لی جہاں سیکریٹری جنرل ٹی این ایف جے علامہ راجہ بشارت حسین امامی نے ریلی سے خطاب کرتے ہوئے کہا کہ سنی شیعہ ہم وطنوں کا عہد و پیمان ہے کہ ہم شیر خدا حیدر کرار اور شجاعت حسینیہ کے پیروکار اور وفائے عباس علمدار کے وارث ہونے کے ناطے سنت مختار پر چلتے ہوئے وطن عزیز پاکستان پر کسی مودی شودی کے ناکام قدم ہرگز نہیں آنے دیں گے۔ در یں اثناء تحریک نفاذ فقہ جعفریہ پاکستان کے سیکریٹری تعلقات عامہ سید حسن کاظمی نے خطاب کرتے ہوئے ازلی دشمن پہ واضح کیا کہ پاک سرزمین کی حفاظت کے لیے 25 کروڑ عوام سیسہ پلائی ہوئی دیوار ہے۔ قرارداد میں کشمیر میں جاری بھارتی اور فلسطین میں یہودی مظالم کی پرزور مذمت کرتے ہوئے تحریک ازادی کشمیر و فلسطین کی بھرپور حمایت کا اعادہ کیا گیا۔
اسلام آباد سے مزید