فرمان الہی
نماز کے اوقات
کراچی (نیوزڈیسک) اقتصادی تعاون تنظیم(ای سی او)کے تحت ٹریڈ پروموشن آرگنائزیشنز کا چوتھا فورم ٹریڈ ڈیولپمنٹ اتھارٹی آف پاکستان (ٹڈاپ) کے ہیڈ آفس کراچی میں منعقد ہوا۔ اس اجلاس میں ایران، آذربائیجان، قازقستان، کرغیز ریپبلک، تاجکستان، ترکمانستان اور ترکیہ کے ٹریڈ پروموشن اداروں کے سربراہان یا نمائندوں نے شرکت کی۔اجلاس کی صدارت ٹریڈ ڈیولپمنٹ اتھارٹی آف پاکستان کے چیف ایگزیکٹو جناب فیض احمد چدھڑ نے کی۔ اجلاس کا آغاز اقتصادی تعاون تنظیم سیکریٹریٹ سے زاہد عباسی کے استقبالیہ کلمات سے ہوا۔ انہوں نے تنظیم سے وابستہ ممالک میں موجود کاروباری مواقع کو اجاگر کیا۔ٹریڈ ڈیولپمنٹ اتھارٹی آف پاکستان کے چیف ایگزیکٹو جناب فیض احمد چدھڑ نے ای سی او کے کردار پر روشنی ڈالتے ہوئے کہا کہ تجارت اور معیشت غربت کے خاتمے اور ترقی کے لیے ایک مؤثر ذریعہ ہے۔ انہوں نے اس بات پر خوشی کا اظہار کیا کہ ای سی او تنظیم ویژن 2026-2035 کی تشکیل پر کام کر رہی ہے۔فورم کے دوران رکن ممالک کے نمائندوں نے اپنے اپنے ملک کا موقف اور خطے میں تجارت کے فروغ میں ٹریڈ پروموشن آرگنائزیشنز کے کردار و مستقبل کے لائحہ عمل پر اظہار خیال کیا۔ای سی او ٹریڈ اینڈ ڈیولپمنٹ بینک کے کردار پر بھی تفصیلی گفتگو ہوئی اور علاقائی انضمام کو مضبوط بنانے پر زور دیا گیا۔اس موقع پر ای سی او ٹریڈ ایگریمنٹ پر بھی تبادلہ خیال ہوا اور یہ فیصلہ کیا گیا کہ ٹریڈ ڈیولپمنٹ اتھارٹی آف پاکستان اپنے معروف ایونٹ فوڈ-ایگ میں، جو اکتوبر 2025میں منعقد ہوگا،ای سی او پویلین قائم کرے گی۔
