فرمان الہی
نماز کے اوقات
کراچی(اسٹاف رپورٹر) کراچی میں پیپلز پارٹی کی صوبائی حکومت کی مسلط کردہ آبی جارحیت،پانی کے بحران و حکومتی سرپرستی میں ٹینکر مافیا راج کے خلاف جماعت اسلامی کے تحت جمعہ کو شہر کی 12اہم شاہراؤں و واٹر ہائیڈرینٹ پر احتجاجی مظاہرے کیے گئے،مظاہرین نے سندھ حکومت، وزیر اعلیٰ، قابض میئر کی جانب سے شہریوں کو ان کے گھروں میں نلکوں میں پانی کی فراہمی بند کرنے اور ٹینکر مافیا کی حکومتی سرپرستی کرنے کے خلاف پُر جوش نعرے لگائے اور اپنے شدید غم و غصے کا اظہار کیا،امیرجماعت اسلامی کراچی منعم ظفر خان نے نپیا ہائیڈرینٹ گلشن اقبال میں احتجاجی مظاہرے سے خطاب کرتے ہوئے کہا کہ کراچی میں اس وقت شدید آبی بحران ،50 فیصد حصہ پانی سے محروم ہے، پیپلز پارٹی کی صوبائی حکومت نے کراچی پر آبی جارحیت مسلط کی ہوئی ہے،کراچی کا تباہ حال انفرااسٹرکچر سب کے سامنے ہے، یونیورسٹی روڈ کو کھود کر تباہ کیا گیا، کراچی یونیورسٹی روڈ پر ریڈ لائین پروجیکٹ کی تعمیر اور پانی کی لائنوں میں کنڈا ڈالنے کے نتیجے میں لائنوں کو خراب کیا گیا، ایسے حالات میں ظلم کے خلاف آواز بلند کرنا اور حکمرانوں کو للکارنا جماعت اسلامی اپنا فرض سمجھتی ہے، جماعت اسلامی کراچی کا مقدمہ ہر فورم پر لڑے گی اور ظالم حکمرانوں سے عوام کا حق لے کر رہے گی، کراچی میں پانی کے بحران و مسائل میں پیپلز پارٹی کے ساتھ ایم کیو ایم بھی برابر کی شریک ہے، پیپلز پارٹی اور ایم کیو ایم بتائیں کہ کے فور منصوبہ ابھی تک کیوں مکمل نہیں ہوا، کے فور منصوبہ اگر اپنے وقت پر مکمل ہوجاتا تو شہر میں پانی کی قلت اور بحران کی موجودہ صورتحال پیدا نہ ہوتی۔
