• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بلوچستان فوڈ اتھارٹی ہیڈکوارٹر میں ایک روزہ تربیتی ورکشاپ

میرا شہر
کوئٹہ
19 جون ، 2025
کوئٹہ(خ ن)بلوچستان فوڈ اتھارٹی ہیڈ کوارٹر کوئٹہ میں بین الاقوامی تنظیم نیوٹریشن انٹرنیشنل کے زیر اہتمام و بی ایف اے کے تعاون سے ایک روزہ تربیتی ورکشاپ کا انعقاد کیا گیا۔ ورکشاپ میں کوئٹہ اور گردونواح سے آٹا چکیوں کے مالکان نے شرکت کی۔ورکشاپ کا مقصد آٹے کی تیاری کے دوران غذائی تحفظ، فورٹیفکیشن کے جدید طریقہ کار اور QA/QC فوڈ سیفٹی پروٹوکولز پر چکی مالکان کو تربیت فراہم کرنا تھا۔ ماہرین نے بتایا کہ آٹے میں آئرن، فولک ایسڈ، زنک اور وٹامن B-12 جیسے اہم غذائی اجزا شامل کرنا کس طرح خون کی کمی، دماغی کمزوری اور پیدائشی بیماریوں کے خلاف موثر ہتھیار ثابت ہو سکتا ہے۔شرکاء کو یہ بھی بتایا گیا کہ خواتین اور پانچ سال سے کم عمر کے بچے غذائی قلت اور خون کی کمی کا شکار ہوتے ہیں جو نہ صرف صحت کے مسائل بلکہ دوران حمل پیچیدگیوں اور نوزائیدہ اموات کی ایک بڑی وجہ بنتے ہیں۔ فورٹیفائیڈ آٹے کا استعمال ان کمزوریوں اور بیماریوں میں خاطر خواہ کمی لا سکتا ہے۔ بعدازاں ڈائریکٹر جنرل بلوچستان فوڈ اتھارٹی وقار خورشید عالم نے تربیتی سیشن کے اختتام پر شرکاء میں اسناد تقسیم کرتے ہوئے کہا کہ اس نوعیت کی ورکشاپ بلوچستان میں محفوظ اور غذائیت سے بھرپور خوراک کے فروغ کی جانب مثبت قدم ہے جس سے نہ صرف صارفین مستفید ہوں گے بلکہ مقامی سطح پر خوراک کے معیار میں بھی نمایاں بہتری آئے گی ۔آخر میں نیوٹریشن انٹرنیشنل کی ٹیم نے تعاون کے اعتراف میں ڈی جی بی ایف اے کو خصوصی شیلڈ پیش کی۔
کوئٹہ سے مزید