فرمان الہی
نماز کے اوقات
فرانس کے ایک گاؤں میں اس وقت شادی کی خوشی غم میں بدل گئی جب ایک مسلح شخص نے دلہن کو فائرنگ کرکے موت کے گھاٹ اتار دیا گیا جبکہ دولہا اور ایک بچے کو زخمی کردیا۔
فرانس کے گاؤں گولت میں شادی کی تقریب قیامت کا منظر پیش کرنے لگی، ایک 27 سالہ دلہن کو فائرنگ کر کے قتل کر دیا گیا۔ واقعہ اتوار کی صبح ساڑھے چار بجے کے آس پاس پیش آیا، جب دلہا دلہن شادی کی تقریب کے بعد گاڑی میں سوار ہو کر روانہ ہو رہے تھے۔
فرانسیسی پراسیکیوٹر فلورینس گالتیے کے مطابق ایک گاڑی نے ان کی کار کا پیچھا کیا اور آگے آ کر راستہ روک لیا۔ گاڑی میں سوار نقاب پوش افراد باہر نکلے اور مختلف اقسام کے ہتھیاروں سے نئے نویلے جوڑے پر فائرنگ شروع کر دی۔
فائرنگ سے دلہن موقع پر ہی دم توڑ گئی جبکہ دولہا اور ایک 13 سالہ بچہ شدید زخمی ہو گیا۔
پراسیکیوٹر کے بیان کے مطابق فائرنگ کے دوران ایک حملہ آور بھی ہلاک ہوا، جبکہ دیگر حملہ آور پیدل موقع سے فرار ہوگئے۔
پولیس نے واقعے کی تحقیقات منظم مجرمانہ گروہ کے تحت قتل اور اقدام قتل کے الزامات کے تحت شروع کر دی ہیں، آٹوپسی رواں ہفتے کے آغاز میں کی جائے گی تاکہ حقائق کا تعین کیا جا سکے۔
گولت کے میئر ڈیڈیے پیریلو نے فرانسیسی چینل سے بات کرتے ہوئے کہا کہ گولت ایک پُرامن گاؤں ہے، یہاں کبھی ایسا واقعہ نہیں ہوا، ایک دن گزرنے کے باوجود ہم ابھی تک صدمے میں ہیں اور اب ہمارا صدمہ غصے میں بدل چکا ہے۔
اسی شب آویگنون شہر میں ایک علیحدہ فائرنگ کے واقعے میں ایک اور شخص ہلاک ہوا، تاہم حکام نے ان دونوں واقعات کے درمیان کسی تعلق کی تصدیق نہیں کی۔
