فرمان الہی
نماز کے اوقات
کراچی (اسٹاف رپورٹر)نیشنل سائبر کرائم انویسٹی گیشن ایجنسی نے رینجرز کے ساتھ مشترکہ کارروائی کرتے ہوئے کراچی سے چلنے والے ایک بین الاقوامی آن لائن مالیاتی فراڈ نیٹ ورک کو بے نقاب کر دیا، کارروائی میں 17 ملزمان کو گرفتار کر کے دو مقدمات پیکا اور پاکستان پینل کوڈ کی مختلف دفعات کے تحت درج کر لیے گئے ہیں،حکام کے مطابق عبدالغفار نامی مفرور ملزم جو اس سے قبل ایف آئی آر نمبر 07/2025 میں نامزد ہے اپنے دیگر ساتھیوں کے ساتھ مل کر بکس علی گوٹھ اور اسکائوٹ کالونی کراچی سے آن لائن مالیاتی فراڈ کا نیٹ ورک چلا رہا تھا جس کا نشانہ زیادہ تر خلیجی ممالک کے شہری بن رہے تھے،چھاپے کے دوران عبدالغفار فرار ہو گیا،کارروائی میں ڈیجیٹل آلات، جعلی دستاویزات، کویتی پولیس کی وردی، اور وزارت داخلہ کویت کی جعلی مہر والا مواد برآمد کیا گیا۔حکام نے بتایا کہ تحقیقات اور فرانزک تجزیے سے پتہ چلا کہ ملزمان ایک منظم آن لائن قرضہ اسکیم چلا رہے تھے جس میں موبائل قرضوں کا لالچ دے کر متاثرین سے ذاتی اور بینکنگ معلومات حاصل کی جاتیں اور VoIP سافٹ ویئر اور ایک جعلی ایپ کے ذریعے غیر ملکی افسر بن کر متاثرین کو قانونی کارروائی کی دھمکیاں دی جاتیں۔ملزمان نے IBFT اور ویسٹرن یونین کے ذریعے رقوم وصول کیں۔ اس کے علاوہ جھوٹے بین الاقوامی کالز کے ذریعے متاثرین کو لاکھوں یورو، ڈالر یا درہم کی لاٹری جیتنے کا جھانسہ دے کر مالی نقصان پہنچایا ، چوری شدہ کریڈٹ کارڈ ڈیٹا، منی گرام، Lycamobile اور ویسٹرن یونین کی جعلی دستاویزات بھی ملی ہیں ،حکام کے مطابق ایک مقدمہ میں عثمان ولد سمد، ادریس علی شیر ولد علی شیر، شعیب محمد ولد عبد الستار، وسیم ولد بشیر، سلمان ولد محمد جمعہ، حمزہ ولد گل شیر، سلیمان ولد فرید، عباس ولد گل شیر، سمیر ولد صالح، اور ذیشان ولد عثمان جبکہ دوسرے مقدمہ میں عبدالغفار ولد رمضان، محمد گلباز ولد محمد یوسف، محمد یوسف ولد محمد رمضان، محمد عدنان ولد محمد یوسف، محمد شریف ولد محمد یوسف، قیصر شہزاد ولد شاہد عباس، سجاد ولد عبدالغفار، اور رب نواز ولد محمد ریاض شامل ہیں۔
