فرمان الہی
نماز کے اوقات
پاکستانی شوبز انڈسٹری کے اداکار شمعون عباس نے حمیرا اصغر کی والدہ کے کراچی اور کراچی کے لوگوں کو ’بے حس‘ کہنے پر شدید ردِعمل کا اظہار کیا ہے۔
شمعون عباس نے اپنے ردِعمل میں کہا کہ مجھے حمیرا اصغر کی والدہ کا سوشل میڈیا پر وائرل بیان سن کر بہت افسوس ہوا۔
اُنہوں نے کہا کہ میرا اب ان سے یہ سوال ہے کہ پچھلے 9 مہینے سے آپ لوگ کہاں تھے اور حمیرا اصغر آپ کی وہی بیٹی ہے کہ جس نے آپ سے مدد مانگی تو آپ لوگوں نے اپنی بیٹی کی مدد کرنے سے صاف انکار کر دیا تھا۔
اداکار نے مزید کہا کہ یہ آپ کی وہی بیٹی ہے جس کے والد نے اس کی میت قبول کرنے سے انکار کر دیا تھا لیکن پھر جب یہ معاملہ سوشل میڈیا پر وائرل ہوگیا اور لوگوں نے تنقید کی تو آپ نے اپنا بیان تبدیل کر لیا۔
اُنہوں نے کہا کہ 9 ماہ تک حمیرا سے رابطہ نہ ہونے پر آپ لوگ اتنا بھی نہیں کر سکے کہ اس کے کسی کزن یا پھر اپنے کسی بھی جاننے والے لڑکے کو چند ہزار دے کر کراچی میں حمیرا کی خیرت معلوم کرنے کے لیے بھیج دیتے اور ضرورت پڑنے پر پولیس سے رابطہ کرتے لیکن آپ نے باآسانی اپنی ذمہ داریاں کندھوں سے جھاڑ کر ایک شہر پر الزام لگا دیا کہ کراچی شہر بہت بےدرد ہے اور حمیرا کے ساتھ سب کچھ کراچی کی وجہ سے ہوا۔
شمعون عباسی نے حمیرا اصغر کی والدہ سے مخاطب ہوتے ہوئے مزید کہا کہ حمیرا کی قربت تو آپ کے ساتھ تھی، آپ کی وہ بیٹی تھی، آپ کی ذمہ داری تھی، اس طرح کسی پر الزام لگا کر اپنی ذمہ داریوں سے فارغ ہو جانا بڑا آسان کام ہے۔
انہوں نے مزید کہا کہ یقیناََ ہم لوگ آپ کی تکلیف کا اندازہ نہیں لگا سکتے اور تکلیف ہم لوگوں کو بھی ہوئی اور ہم ان لوگوں میں سے ہیں جنہوں نے جب یہ سنا کہ حمیرا کے والد نے اس کی میت وصول کرنے سے انکار کر دیا ہے تو ہم اس کی تدفین کے سارے انتظامات کرنے کے لیے تیار تھے۔
اداکار نے کہا کہ حمیرا کی موت ایک بہت بڑا سبق دے گئی ہے کہ اپنے چاہنے والوں پر نظر رکھیں، ان سے رابطے میں رہیں اور ان کی خیریت معلوم کرتے رہیں۔
