• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بہت جلد نئی سعودی کمپنیوں میں بلوچ نوجوانوں کو بھیجا جائیگا، جاوید مینگل

میرا شہر
کوئٹہ
22 اگست ، 2025
کوئٹہ(اسٹاف رپورٹر)بلوچستان کے نوجوانوں کے لیے روزگار کے نئے دروازے کھولنے کے لیے ایم ڈی بلوچستان ٹیکنیکل ایجوکیشن اینڈ ووکیشنل ٹریننگ اتھارٹی طارق جاوید مینگل نے سعودی عرب کا دورہ کیا۔ اس دورے کے دوران انہوں نے متعدد سعودی کمپنیوں کے سربراہان سے ملاقاتیں کیں اور نوجوانوں کے لیے روزگار کے نئے مواقع تلاش کرنے پر غور کیا۔طارق جاوید مینگل نے چیف منسٹر یوتھ سکل ڈویلپمنٹ اینڈ اوورسیز اپلائمنٹ پروگرام کے تحت سعودی عرب بھیجے گئے بلوچ نوجوانوں سے بھی خصوصی ملاقات کی۔ اس موقع پر انہوں نے سعودی عرب میں برسر روزگار نوجوانوں کے مسائل سماعت کئے اور ان کے فوری حل کا یقین دلایا۔سعودی عرب میں کام کرنے والے نوجوانوں نے وزیر اعلیٰ بلوچستان میر سرفراز احمد بگٹی کے اس احسن اقدام پر شکریہ ادا کیا جس کے تحت انہیں بیرون ملک روزگار کے مواقع فراہم کیے گئے۔ نوجوانوں نے کہا کہ اس اقدام سے نہ صرف ان کی معاشی حالت بہتر ہوگی بلکہ صوبے کے لیے زرمبادلہ کے حصول میں بھی مدد ملے گی۔اس موقع پرایم ڈی بی ٹیوٹا نے کہا کہ پوری دنیا میں پہلی بار ایسا پروگرام متعارف ہوا کہ تمام اخراجات حکومت بر داشت کر کے نوجوانوں کو باہر ممالک روزگار کے لئے بھجوارہی ہے ، انھوں بتایا کہ ہمارے لئے یہ اعزاز بھی ہے کہ ہمارے بھیجے گئے نوجوان" نیوم سٹی " کی تعمیر میں کام کر رہے ہیں ۔طارق جاوید مینگل نے مزید کہا کہ سعودی کمپنیوں کے ساتھ ہونے والے مذاکرات بہت مثبت رہے اور بہت جلد نئی کمپنیوں میں بلوچستان کے نوجوان خصوصا بلوچ نوجوانوں کو بھیجا جائے گا۔ انہوں نے کہا کہ یہ سب وزیر اعلیٰ بلوچستان کے نوجوانوں کے مستقبل کے حوالے سے ویژن کی بدولت ممکن ہوا ہے۔
کوئٹہ سے مزید