• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اطالوی سائفر پر سینیٹ کمیٹی برہم، زرعی برآمدات کی رپورٹ طلب

آج کا اخبار
اہم خبریں
05 ستمبر ، 2025
اسلام آباد(اسرار خان)اطالوی سائفرپر سینیٹ قائمہ کمیٹی برہم، زرعی برآمدات کی رپورٹ طلب کرلی۔ وزارت غذائی تحفظ حکام سے اسکینڈلز، خالی عہدوں و برآمدی پروٹوکول توڑنے پر سخت سوالات کیے گئے۔ تین سابق ڈائرکٹر جنرلز سنگین بے قاعدگیوں اور اسکینڈلز پر برطرف یا ریٹائرہوئے، کمیٹی نےانہیں طلب کر لیا۔ٹڈی دل کنٹرول کے لیے مختص طیارے ناکارہ ہونے پر کمیٹی کا کراچی میں اجلاس اوران کا معائنہ کرنیکا اعلان کردیا۔اٹلی نے پاکستان کو ایک خفیہ پیغام بھیجا ہے جس میں ملک کی زرعی برآمدات پر تحفظات کا اظہار کیا گیا ہے، جس کے بعد سینیٹ کی قائمہ کمیٹی برائے قومی غذائی تحفظ اور تحقیق نے جمعرات کو گذشتہ پانچ سال کے برآمدی ریکارڈ کا مطالبہ کیا۔ اراکینِ پارلیمنٹ نے وزارتِ غذائی تحفظ اور تحقیق کے حکام سے اسکینڈلز، خالی اعلیٰ عہدوں اور برآمدی پروٹوکول کی خلاف ورزیوں پر سخت سوالات کیے۔کمیٹی کے چیئرمین سینیٹر سید مسرور احسن نے اجلاس کے دوران اس خفیہ پیغام کا انکشاف کیا اور کہا کہ اس سے غذائی تحفظ کے شعبے میں نگرانی پر سنگین سوالات اٹھتے ہیں۔ اس انکشاف کے بعد وزارت کی کارکردگی پر گرما گرم بحث شروع ہو گئی، جس میں احسن نے ڈائریکٹر جنرل کا عہدہ نو ماہ سے خالی رہنے پر برہمی کا اظہار کیا۔فوڈ سیکورٹی کے سیکرٹری محمد آصف نے بتایا کہ اس عہدے پر فائز رہنے والے تین افسران کو سنگین بے قاعدگیوں اور اسکینڈلز میں ملوث پائے جانے کے بعد یا تو برطرف کر دیا گیا تھا یا وہ ریٹائر ہو چکے ہیں۔ کمیٹی نے ہدایت کی کہ ان تینوں سابق ڈائریکٹر جنرلز کو انکوائری افسران سمیت کمیٹی کے سامنے پیش کیا جائے۔اراکینِ پارلیمنٹ نے برآمدی معیاری عملی طریقہ کار کی خلاف ورزیوں پر بھی تشویش کا اظہار کیا، جن میں ایران کو آم کی ایسی کھیپ بھیجنا شامل تھا جو پروٹوکولز کو نظر انداز کر کے بھیجی گئی۔
اہم خبریں سے مزید