فرمان الہی
نماز کے اوقات
امریکی ٹیکنالوجی کمپنی میٹا کے خلاف مارک زکربرگ عدالت پہنچ گئے۔
مارک زکربرگ کا نام سن کر اگر آپ میٹا کے سربراہ مارک زکربرگ کا تصور کر رہے ہیں تو آپ نے بھی وہی غلطی دہرا دی جس کے خلاف امریکی وکیل مارک زکربرگ نے عدالت کا رخ کیا ہے۔
غیر ملکی میڈیا رپورٹس کے مطابق امریکی وکیل جو فیس بک کی مالک کمپنی میٹا کے سربراہ مارک زکربرگ کے ہم نام ہے، انہوں نے بار بار اپنا فیس بک اکاؤنٹ میٹا کی جانب سے معطل (بلاک) کیے جانے کے بعد ٹیکنالوجی کمپنی پر مقدمہ دائر کردیا ہے۔
میڈیا رپورٹ کے مطابق اٹارنی مارک ایس زکربرگ ریاست انڈیانا میں مقیم ہیں اور تقریباً 38 سالوں سے دیوالیہ پن کے قانون دان ہیں۔
ان کا کہنا ہے کہ فیس بک نے گزشتہ آٹھ سالوں میں پانچ بار ان کا اکاؤنٹ معطل کیا۔
مارک ایس زکربرگ نے میٹا کے خلاف اپنے مقدمے میں مؤقف اختیار کیا ہے کہ ہر بار یہ کہہ کر میرا فیس بک اکاؤنٹ معطل کردیا جاتا ہے کہ میں کسی اور کا نام استعمال کر رہا ہوں، جس کی وجہ سے ناصرف میری وکالت کی پریکٹس متاثر ہوتی ہے بلکہ مجھے کاروبار میں بھی ہزاروں ڈالر کا نقصان اٹھانا پڑا۔
انہوں نے وضاحت دیتے ہوئے کہا کہ میں نے فیس بک کو اپنی شناخت سے متعلق تمام دستاویزات جس میں میری تصاویر، کریڈٹ کارڈ اور فوٹو آئی ڈی شامل ہیں فراہم کئے، جس سے یہ ثابت ہوتی ہے کہ میرا نام برسوں پرانا اور اصلی ہے۔ اس کے باوجود میرا اکاؤنٹ بار بار معطل کیا جاتا ہے۔
ان کا یہ بھی کہنا ہے کہ بار بار معطلی سے میری پیشہ ورانہ ساکھ کو نقصان پہنچا ہے اور یہی وجہ ہے کہ میں میٹا کے خلاف قانونی کارروائی کرنے پر مجبور ہوں۔
