• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

لانڈھی میں پانچ روز سے لاپتہ بچے کی بوری بند لاش کچرا کنڈی سے ملی

آج کا اخبار
اہم خبریں
23 ستمبر ، 2025
کراچی( اسٹاف رپورٹر )لانڈھی میں پانچ روز سے لاپتہ بچے کی بوری بند لاش کچرا کنڈی سے ملی۔تفصیلات کے مطابق لانڈھی کے علاقے 36 بی لعل مزار گندی گلی میں کچرا کنڈی سے ایک بچے کی بوری بند لاش ملی جسے جناح اسپتال منتقل کیا گیا ۔بچے کی شناخت 7 سالہ سعد علی ولد سلمان علی کے نام سے ہوئی۔پولیس کے مطابق مقتول بچہ 18 ستمبر کو تھانہ لانڈھی کی حدود بی ایریا نزد گوشت مارکیٹ سے لاپتہ ہوا تھا جس کی گمشدگی کا مقدمہ تھانہ لانڈھی میں درج کیا گیا تھا ۔پولیس کے مطابق پیر کی شب کچرا کنڈی سے لا پتہ بچے کی لاش ملی ہے ۔پولیس نے بتایا کہ بچے کو قتل کیا گیا ہے یا کوئی اور معاملہ ہے تمام پہلوؤں سے دیکھا جارہا ہے ۔ بچے کے والد نے بتایا کہ مقتول سعد ان کا اکلوتا بیٹا تھا۔چند روز قبل بچے کا اسکول ایڈمیشن کروایا تھا،جس روز سعد لاپتہ ہوا میں اسکول اور بعد ازاں اسے ٹیوشن سے لے کر آیا تھا۔ وہ گھر سے بیس روپے لے کر چیز لینے نکلا تھا اس کے بعد سے لاپتہ تھا،پانچ روز سے ہم مسلسل اسے تلاش کرتے رہے۔ان کا کہنا تھا کہ ہماری کسی سے کوئی دشمنی نہیں ہے ،مجھے انصاف چاہیے ،بچے کے ماموں خرم نے بتایا کہ پولیس نے ہمارے ساتھ تعاون نہیں کیا،ہم پولیس کو کہتے رہے کہ کیمرے چیک کرے لیکن پولیس ہمیں کہتی رہی کہ ظم خود کیمرے چیک کریں،ہم مزدور لوگ ہیں ہماری کسی سے کوئی دشمنی نہیں ہے۔بچے کی لاش گھر سے دو گلیاں چھوڑ کر ملی ہے ۔انہوں نے وزیر اعلیٰ سندھ اور گورنر سندھ سے اپیل کی کہ انھیں انصاف فراہم کیا جائے۔لاش ملنے کی اطلاع پر بچے کے گھر میں کہرام مچ گیا ،خواتین شدت غم سے نڈھال ہوگئیں جبکہ علاقہ مکینوں کی بڑی تعداد گھر کے باہر جمع ہوگئی۔ واقعہ پر علاقہ مکینوں نے شدید غم و غصے کا اظہار کرتے ہوئے مطالبہ کیا کہ سعد علی کے اغوا اور اس کے بے رحمانہ قتل میں ملوث سفاک قاتلوں کا سراغ لگا کر انھیں کیفر کردار تک پہنچایا جائے ۔
اہم خبریں سے مزید