• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

دہشتگردی کا الزام کسی ایک جماعت کو نہیں دیا جاسکتا، تحریک انصاف

آج کا اخبار
اہم خبریں
12 اکتوبر ، 2025
پشاور (جنگ نیوز) پاکستان تحریک انصاف (پی ٹی آئی) رہنماؤں نے کہا ہے کہ دہشت گردی کا الزام کسی ایک جماعت یا کسی ایک فیصلے کو نہیں دیا جاسکتا، واضح کیا کہ خیبرپختونخوا میں ناجائز طور پر حکومت بنائی گئی تو اسے چلنے نہیں دیں گے۔پشاور میں پریس کانفرنس کے دوران پی ٹی آئی رہنماؤں سلمان اکرم راجا، جنید اکبر اور اسد قیصر نے واضح کیا ہے کہ پاکستان تحریک انصاف قوم کے شہدا، ریاست اور قانون کے ساتھ کھڑی ہے اور خیبرپختونخوا اور ملک میں ترقی اور استحکام چاہتی ہے۔پی ٹی آئی کے سیکریٹری جنرل سلمان اکرم راجا کا کہنا تھا کہ خیبرپختونخوا میں آئینی تبدیلی کو غیرآئینی طریقے سے روکنے کی کوشش کی جا رہی ہے اور ہمیں ہر طرح سے ڈرایا جا رہا ہے۔ان کا کہنا تھا کہ وطن کی خاطر جانوں کا نذرانہ پیش کرنے والوں کے ساتھ کھڑے ہیں، ملک کی طرف میلی آنکھ سے دیکھنے والوں کے خلاف ہیں، جنگ اور جدل کا سلسلہ ختم کرنا ہوگا۔انہوں نے کہا کہ خیبرپختونخوا گزشتہ دہائی سے لہولہان ہے، دہشت گردی کا الزام کسی ایک جماعت یا فیصلہ کو نہیں دیا جاسکتا، ہمیں بتایا جائے کس دہشتگرد کو ملک میں بسایا ہے۔ان کا کہنا تھا کہ ہم چاہتے ہیں کہ ہر فیصلہ میں سب کو ساتھ لے کر جانا چاہیے، اسلحہ اور بارود سے دہشتگردی کا حل نہیں مل سکتا، 2021 میں ایک منصوبہ پیش ہوا جسے حکومت نے رد کیا تھا، نیشنل سیکیورٹی کونسل میں مذاکرات کا فیصلہ ہوا تھا۔سلمان اکرم راجا کا کہنا تھا کہ پی ٹی آئی کی دور میں دہشتگردی کم ترین سطح پر تھی، ساڑھے 3 سال پہلے افغانستان کے ساتھ ہمارے اچھے تعلقات تھے۔انہوں نے کہا کہ ہم پر غداری کا الزام نہ لگایا جائے، ہم سب پاکستان کے خیر خواہ ہیں، صوبے میں وزارت اعلیٰ کی تبدیلی نئی شروعات ہے کسی سے مقابلہ نہیں ہے، ہمیں گورنر راج کا کہا جارہا ہے۔ان کا کہنا تھا کہ ہم صوبے میں گورننس کو مزید بہتر کریں گے، خلا پیدا کرنے بعد صورتحال مزید خراب ہوئی ہے۔سابق اسپیکر قومی اسمبلی اسد قیصر نے سہیل آفریدی کو وزرات اعلیٰ کا مناسب حقدار قرار دیا اور خبردار کیا کہ ناجائز طور پر حکومت بنائی گئی تو چلنے نہیں دیں گے۔پی ٹی آئی خیبرپختونخوا کے صدر جنید اکبر کا کہنا تھا کہ تحریک انصاف صوبے میں اپنی حکومت کا بھرپور تحفظ کرے گی۔
اہم خبریں سے مزید