• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ضلع وسطی میں قائم اسکول فیڈرل بی ایریا نمبر 9 بھی لینڈ مافیا کی نذر

آج کا اخبار
اہم خبریں
15 اکتوبر ، 2025
کراچی(سید محمد عسکری) ضلع وسطی میں قائم اسکول ماڈرن انگلش گرامر لوئر سیکنڈری اسکول فیڈرل بی ایریا نمبر9بھی لینڈ مافیا کی نذر ہوگیا ہے۔ بتایا جاتا ہے کہ سنگم گراؤنڈ فیڈرل بی ایریا بلاک 9 کا سرکاری لوئر سیکنڈری اسکول ’’ماڈرن انگلش گرامر لوئر سیکنڈری اسکول‘‘ قائم تھا جسے سابق وزیر تعلیم پیر مظر الحق کے دور میں راتوں رات قبضہ کر کے توڑنے کی کوشش کی گئی،معاملہ میڈیا میں آیا تو رک گیا، پولیس نے توڑنے والے کو گرفتار بھی کیا مگر اسکول کی مرمت نہیں کی گئی۔ اس وقت اسکول میں 200 بچے تھے پھر یہ دوبارہ تعمیر نہیں ہوا۔ اپریل 2021 میں اچانک لینڈ مافیا نے پورا اسکول چند روز قبل خاموشی سے گرادیا تھا اور اسکول خالی پلاٹ میں تبدیل ہوگیا تھا یہ اسکول کارنر کا پلاٹ 400 گز کے کارنر پلاٹ پر واقع ہے جس کی قیمت کروڑ وں روپے بتائی جاتی ہے۔ 1974 میں بھٹو کے دور حکومت میں اسے قومیا لیا گیا تھا اس کے اصل مالکان بیرون ملک چلے گئے تھے اور پھر واپس نہیں آئے، اس کی ملکیت کا کوئی دعویدار بھی نہیں تھا اور تاحال یہ سرکار کی ملکیت میں تھا مگر کچھ عرصہ قبل اس کا چوکیدار بھی ریٹائر ہوگیا تھا جس کے بعد یہاں کسی اور کو تعینات نہیں کیا گیا جس کا فائدہ لینڈ مافیا نے اٹھایا اور راتوں رات اسکول توڑ دیا تھا۔ اس وقت کے ڈی او سیکنڈری اسکول وسطی ارشد بیگ جو اب ڈائریکٹر اسکول سکینڈری کراچی ہو گئے ہیں انھوں نے کہا تھا انہوں نے اسکول خود دورہ کیا تو دیکھا کہ اسکول کو ملبے کا ڈھیر بنادیا گیا ہے، یہ اسکول کئی سال سے بند تھا اور لینڈ مافیا کی اس پر نظریں تھیں تاہم اس معاملے کی جانچ پڑتال اور عمارت توڑنے والوں کے خلاف ایف آئی آر درج ہوگی، پلاٹ کو محفوظ بنانے کے لئے ایجوکیشن ورکس کو لکھا جائے گا کہ وہ فوری طور پر چہار دیواری اور کچھ کمرے تعمیر کردیے تاہم چار سال گزرنے کے باوجود پلاٹ کو لینڈ مافیا کے قبضے کے لیے خالی چھوڑ دیا گیا ہے۔ جنگ نے جب ڈائریکٹر اسکولز کراچی ارشد بیگ سے رابطہ کیا تو انھوں نے کہا کہ میرے علم میں یہ بات آئ ہے کہ لینڈ مافیا نے اسکول کے خالی پلاٹ پر چہار دیواری قائم کرنا شروع کردی ہے چناچہ میں نے اپنے ڈی او کو وہاں بھیج دیا ہے، معاملہ عدالت میں ہے اسکول کا اصل مالک کوئ نہیں ہے انھوں نے کہا کہ جب میں ڈی او تھا تو اس وقت اس کی عمارت گرائ گئی تھی میں ایف آئ آر کٹوائی تھی اور تجویز دی تھی کہ جگہ کو لینڈ مافیا سے بچانے کے لیے فوری محکمہ تعلیم کا دفتر قائم کردیا جائے۔
اہم خبریں سے مزید