فرمان الہی
نماز کے اوقات
کراچی (اسٹاف رپورٹر) شاہین شاہ آفریدی کو فارم میں واپسی کا انعام کپتانی کے تاج کی صورت میں مل گیا۔ ویسٹ انڈیز کی ون ڈے سیریز میں شکست کے بعد پاکستان کرکٹ بورڈ نے محمد رضوان کو ون ڈے کی کپتانی سے ہٹا کر ذمے داریاں شاہین شاہ آفریدی کو سونپ دی ہیں۔ شاہین کو گذشتہ سال ٹی ٹوئنٹی کی کپتانی سے ہٹاکر بابر اعظم کو کپتان بنایا گیا تھا۔ اس تقرری کے بعد رضوان کا ٹیم میں جگہ برقرار رکھنا مشکل ہے۔ پیر کی شب اسلام آباد میں ہونے والے اجلاس میں وکٹ کیپر محمد رضوان کو قیادت سے فارغ کرنے کا فیصلہ کیا گیا۔ ذرائع کے مطابق ہیڈ کوچ مائیک ہیسن محمد رضوان کو کپتانی سے ہٹاکر شاہین کو کپتان بنانا چاہتا تھے جس کے بعد پی سی بی چیئرمین نے مشاورتی اجلاس طلب کیا تھا۔ بائیں ہاتھ کے فاسٹ بولر جنوبی افریقا کے خلاف تین میچوں کی ون ڈے سیریز میں پاکستان کی قیادت کریں گے، جو 4 سے 8 نومبر تک فیصل آباد کے اقبال اسٹیڈیم میں کھیلی جائے گی۔ پیر کو اسلام آباد میں ہونے والے اجلاس میں وائٹ بال ہیڈ کوچ مائیک ہیسن، ڈائریکٹر ہائی پرفارمنس عاقب جاوید اور سلیکشن کمیٹی ارکان نے شرکت کی۔25 سالہ فاسٹ بولر نے 66 ون ڈے اور 92 ٹی ٹوئنٹی میچز کھیلے ہیں، جن میں انہوں نے مجموعی طور پر 249 وکٹیں حاصل کیں۔ 32 ٹیسٹ میچوں میں، جن میں راولپنڈی کرکٹ اسٹیڈیم میں جنوبی افریقا کے خلاف جاری دوسرا ٹیسٹ شامل نہیں ہے، 120 وکٹیں حاصل کی ہیں۔ شاہین اس سے قبل 2024 میں نیوزی لینڈ کے خلاف ان کے ہوم گراؤنڈ پر پانچ ٹی ٹوئنٹی انٹرنیشنل میچوں میں پاکستان کی قیادت کر چکے ہیں۔
