فرمان الہی
نماز کے اوقات
فٹبال کے عالمی اسٹار کرسٹیانو رونالڈو نے پہلی بار اپنی منگیتر جارجینا روڈریگز کو شادی کی پیشکش کے لمحے کی تفصیلات بتاتے ہوئے انکشاف کیا ہے کہ ان کی منگنی کا لمحہ بالکل غیر منصوبہ بند تھا۔
حالیہ انٹرویو میں رونالڈو نے بتایا کہ جارجینا کو انگوٹھی کی قیمت یا چمک دمک سے کوئی غرض نہیں تھی۔
انہوں نے کہا کہ مجھے اس بات سے پیار ہے کہ اسے انگوٹھی کی پرواہ نہیں تھی، اس نے بس مجھ سے پوچھا کہ کیا میں سچا ہوں؟ میں نے کہا کہ ہاں، میں تمہیں چاہتا ہوں اور تم سے شادی کرنا چاہتا ہوں۔
رونالڈو نے اعتراف کیا کہ اس لمحے میں بے حد جذباتی ہوگیا تھا، میں رویا تو نہیں، لیکن آنکھوں میں آنسو ضرور تھے۔
انہوں نے مزید کہا کہ میں نے انگوٹھی کا ہیرا خود جارجینا کے ذوق کے مطابق منتخب کیا، وہ ہمیشہ خوبصورت پتھر کا خواب دیکھتی تھی، میں نے کافی محنت کے بعد وہ ڈائمنڈ ڈھونڈا جو اسے پسند آئے۔
رونالڈو نے مسکراتے ہوئے کہا کہ اگرچہ میں خود کو زیادہ رومانوی شخص نہیں سمجھتا، مگر یہ لمحہ قدرتی طور پر پیش آگیا، یہ تقریباً رات ایک بجے کا وقت تھا، میری بیٹیاں سو چکی تھیں، ایک دوست نے انگوٹھی دی اور اسی وقت میرے دونوں بچے اندر آئے اور بولے ڈیڈی، آپ ماما کو انگوٹھی دینے والے ہیں، تب مجھے لگا کہ یہی صحیح وقت ہے۔
انہوں نے بتایا کہ اگرچہ یہ لمحہ پہلے سے طے شدہ نہیں تھا، لیکن سب کچھ خودبخود خوبصورت بن گیا، میں جانتا تھا کہ کبھی نہ کبھی میں یہ کروں گا، لیکن اس رات کا ارادہ نہیں تھا، دوست ویڈیو بنا رہے تھے، سب کچھ بالکل پرفیکٹ ہوگیا۔
البتہ، شادی کے بارے میں سوال پر انہوں نے واضح کیا کہ ابھی اس کی کوئی جلدی نہیں، ہم نے ورلڈ کپ کے بعد شادی کرنے کا سوچا ہے، ٹرافی کے ساتھ، جارجینا کو بڑی تقریبات پسند نہیں، تو میں اس کی خواہش کا احترام کروں گا۔
یاد رہے کہ اس جوڑے نے اگست میں اپنی منگنی کا اعلان کیا تھا اور ایک تصویر شیئر کی تھی جس میں جارجینا کی انگوٹھی نمایاں تھی، رپورٹس کے مطابق یہ ہیرا 37 قیراط کا ہے جس کی مالیت تقریباً 5 ملین ڈالر بتائی جاتی ہے۔
