فرمان الہی
نماز کے اوقات
کراچی( ثاقب صغیر )سندھ میں 4 برس کے دوران کاروکاری قرار دے کر 466 خواتین سمیت 595 افراد کو قتل کر دیا گیا۔تفصیلات کے ۜمطابق سندھ کے مختلف علاقوں میں گزشتہ 4 برسوں کے دوران 595 افراد کو کاروکاری قرار دے کر قتل کر دیا گیا،قتل ہونے والوں میں 466 خواتین اور 129 مرد شامل ہیں۔پولیس ریکاڈ کے مطابق سال 2022 میں 102 واقعات میں 114 افراد کو کاروکاری قرار دے کر قتل کیا گیا جن میں 89 خواتین اور 25 مرد شامل تھے۔سال 2023 میں کاروکاری کے 151 واقعات میں 167افراد قتل ہوئے۔قتل ہونے والوں میں 135خواتین اور 32مرد شامل تھے۔سال 2024 میں کاروکاری کے 132 واقعات میں 152 افراد کو قتل کیا گیا۔قتل ہونے والوں میں 123 خواتین اور 29 مرد شامل ہیں۔سال 2025 میں دس ماہ کے دوران ( ماہ اکتوبر تک )صوبے میں کاروکاری کے 140 کیسز رپورٹ ہوئے جن میں 162 افراد کو قتل کیا گیا۔قتل ہونے والوں میں 119 خواتین اور 43 مرد شامل ہیں۔ریکارڈ کے مطابق کاروکاری قرار دے کر قتل کرنے والے ملزمان میں 294 ملزمان مقتولین کے شوہر، والد ، والدہ، بھائی، بیٹے ، بیٹی اور بہنیں ہیں۔ 204 دیگر رشتہ دار جبکہ 16 پڑوسی ، دوست اور دیگر ملزمان شامل ہیں۔پولیس کے مطابق چار برس کے دوران کاروکاری کے واقعات میں ملوث ملزمان میں 171 مقتولین کے شوہر، 33 مقتولین کے باپ، 77 مقتولین کے بھائی، 5مقتولین کے بیٹے،دو مقتولین کی بہنیں ،دو مقتولین کی والدہ اور 4 مقتولین کی بیٹیاں شامل ہیں جنہوں نے مقتولین کو قتل کیا ۔
