• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

براہوئی زبان کے نامور شاعر محمد اسحٰق سوزکی یاد میں تعزیتی ریفرنس

میرا شہر
کوئٹہ
15 دسمبر ، 2025
کوئٹہ(اسٹاف رپورٹر)براہوئی ادبی سوسائٹی کے زیراہتمام براہوئی زبان کے نامور شاعر محمد اسحٰق سوز مرحوم کی یاد میں نوری نصیر خان کمپلیکس میں تعزیتی ریفرنس کا اہتمام کیا گیا ۔ تقریب کی صدارت جامعہ گوادر کے وائس چانسلر ممتاز شاعر و محقق ڈاکٹرعبدالرزاق صابر نے کی جبکہ مہمان خاص بلوچی اکیڈمی کے جنرل سیکرٹری پروفیسرعرفان جمالدینی تھے ، اسٹیج سیکریٹری کے فرائض براہوئی ادبی سوسائٹی کے جنرل سیکرٹری پروفیسر حسن ناصر نے انجام دیئے ۔ تقریب کا آغاز تلاوت کلام پاک سے ہوا جبکہ مرحوم اسحٰق سوز کے ایصال ثواب کے لیے دعائے مغفرت کی گئی ۔ مقررین نے محمد اسحٰق سوز کی زندگی ، شاعری اور ادبی خدمات پر روشنی ڈالتے ہوئے انہیں براہوئی زبان کا عظیم اور ہمہ جہت شاعر قرار دیا ۔ اپنے صدارتی خطاب میں ڈاکٹر عبدالرزاق صابر نے کہا کہ محمد اسحاق سوز کے بغیر براہوئی غزل نامکمل ہے ان کی غیر مطبوعہ براہوئی ، اردو اور فارسی شاعری شائع کرنا وقت کی اہم ضرورت ہے ۔ مہمانِ خاص پروفیسر عرفان جمالدینی نے کہا کہ سوز کی شعری روایت آنے والی نسلوں کے لیے قیمتی اثاثہ ہے ۔ تقریب میں افضل مراد ، وحید زہیر ، نور خان نواب ، شاہین بارانزئی ، نجیب سائر ، پروفیسر حمیرا صدف اور سائر عزیز نے بھی اظہارِ خیال کیا اور مرحوم کو زبردست خراجِ عقیدت پیش کیا۔
کوئٹہ سے مزید