فرمان الہی
نماز کے اوقات
مظفر آباد،کوٹلی، تراڑکھل (جنگ نیوز، ایجنسیاں) آزاد کشمیر میں کالعدم عوامی ایکشن کمیٹی کے مظاہرین اور فورسز میں جھڑپوں کے دوران 2اہلکاروں سمیت 9افراد جاں بحق ہوگئے، غیرملکی خبر رساں ایجنسی کے مطابق پونچھ کے ڈویژنل کمشنر وحید خان نے بتایا کہ مظاہرین نے ایک سکیورٹی قافلے کا راستہ روکا اور اہلکاروں پر حملہ کیا۔ جس پر پولیس اور سکیورٹی اہلکاروں نے اپنے دفاع میں جوابی کارروائی کی۔انہوں نے بتایا کہ تڑارکھل میں 6 مظاہرین اور ایک پولیس اہلکار مارا گیا جبکہ راولا کوٹ میں ہونے والی ایک الگ جھڑپ میں ایک مظاہرین میں ایک شخص جبکہ اور ایک سکیورٹی اہلکار جان کی بازی ہار گیا،آزاد کشمیر میں حکام کا کہنا ہے کہ راولا کوٹ میں ٹریفک بحالی آپریشن کے دوران کالعدم ایکشن کمیٹی کے جتھوں نے سیکورٹی فورسز نے شہریوں پر حملہ کردیا جسکے نتیجے میں سیکورٹی اہلکار شہید ہوئے، حکام کا کہنا ہے کہ بلوچ بازار میں شاہراہ پر قائم رکاوٹیں ہٹانے کے دوران جھڑپ، پبلک ٹرانسپورٹ اور اشیائے ضروریہ کی ترسیل متاثر،سڑک ہر صورت بحال کی جائیگی۔ تفصیلات کے مطابق کوٹلی،تراڑکھل شاہراہ کو ٹریفک کیلئے بحال کرنے کی غرض سے بلوچ بازار کے مقام پر سیکورٹی فورسز کی جانب سے کلیئرنس آپریشن جاری ہے۔ حکام کے مطابق شاہراہ پر قائم رکاوٹوں کے باعث آمدورفت، پبلک ٹرانسپورٹ اور اشیائے خوردونوش کی ترسیل مکمل طور پر متاثر ہو گئی تھی۔ آپریشن کے دوران حکام کے مطابق کالعدم قرار دی گئی جوائنٹ ایکشن کمیٹی سے منسلک مسلح افراد کی جانب سے مزاحمت اور فائرنگ کی گئی۔
