جاب کیلئے درکار صلاحیتیں اور CV کی تیاری

اگر آپ جاب کی تلاش میں ہیں تو آپ کے لیے یہ جاننا ضروری ہے کہ CV(سی وی) کے مقبول ترین ٹرینڈز کون سے ہیں۔ جاب مارکیٹ میں مسابقت کے باعث آپ کی سی وی اتنی پاورفل ہونی چاہئے کہ وہ آپ کی عدم موجودگی میں بھی آپ کا مقدمہ عمدگی سے لڑے۔ ملازمت پر رکھنے والے منیجرز آپ کے سی وی میں جس چیز کو تلاش کرتے ہیں، آپ کو اس پر کام کرنے کی ضرورت ہے۔ کسی بھی ملازمت کے لیے درکار قابلیت اور تجربے کی جھلک آپ کی سی وی میںہونی چاہیے، اس کے علاوہ اس کے مختلف ٹرینڈز پر بھی آپ کی نظر ہونی چاہیے۔

مکمل تبدیلی نہ لائیں

نئے سی وی اسٹائل کو سیکھنے کے چکر میں ذہن پر زیادہ دباؤ نہ ڈالیں۔ بھئی کچھ چیزیں تو بہرحال وہی رہیں گی، جو ہر سی وی میں موجود ہوتی ہیں۔ مثال کےطور پر ملازمت پر رکھنے والے زیادہ تر منیجرز آج بھی آپ کےObjective statement پر موجود خلاصہ (Summary) پڑھنے کو ترجیح دیتے ہیں۔ وہ آپ کی کامیابیوں، ورک ہسٹری اور مہارتوںکی معلومات دیکھنا چاہتےہیں۔ آپ کی سی وی کا فارمیٹ آسان ہونا چاہیےتاکہ اسے پڑھنے والے کو مطلوبہ معلومات آسانی سے مل جائیں۔ سب سے اہم بات یہ ہے کہ ہر ہائرنگ منیجر آپ کی پریزنٹیشن دیکھنے کے لیے بہت پُرجوش ہوتا ہے۔

ٹیکنالوجی اہمیت رکھتی ہے

حالیہ عشرے میں ٹیکنالوجی بہت اہمیت اختیار کرگئی ہے۔ اپنے حریفوں کے ساتھ قدم سے قدم ملا کرچلنے کے لئے آجکل کی کمپنیاں اس بات کو یقینی بناتی ہیں کہ ان کے ملازمین ٹیکنالوجی کی تبدیلیوں سے آگاہ رہیں ( چاہے وہ کمپیوٹر پروگرامز ہوں یا پھر موبائل فون ایپس)۔ ہائرنگ منیجرز انٹرویوکے دوران یہ توقع رکھتے ہیںکہ آپ ٹیکنالوجی کے حوالے سے بھی ایک قابل امیدوار ثابت ہوں۔ آ پ کو اپنی فیلڈ میں ٹیکنالوجی کی جدید ترین پیش رفت سے واقفیت ہونابھی ضروری ہے اور اپنی اس قابلیت کا ذکر اپنی سی وی میں کرنا ہرگز نہ بھولیں۔ اگر آپ سمجھتے ہیں کہ کچھ کمی ہے تو وقت نکال کر ریسرچ کریں، اپنی انڈسٹری کے آن لائن ریسورسز اور ٹریڈ پریا ڈیکلز کا معائنہ کریں اور ان ٹرینڈز کا مطالعہ کریں، جو آپ کی انڈسٹری پر اثر انداز ہو رہے ہیں۔ اس کے بعد ٹیکنالوجی کی ان معلومات کو اپنے سی وی میں شامل کرلیں۔

کچھ تخلیقی رُخ سامنے لائیں

تجربہ کار ہائرنگ منیجرز کی نظروں سے ہزاروں سی وی گزرتے ہیں، اس لئے جب تک آپ کا سی وی کچھ تخلیقی، منفرد اور مطلوبہ معلومات لیے نہیں ہوگا تو وہ انھیں متوجہ نہیں کرپائے گا۔ خود کو دوسروںسے ممتاز کرنے کیلئے آپ کو ہر لفظ ناپ تول کر لکھنا ہوگا۔ آپ کی لفاظی اتنی مضبوط اور بیانیہ ایسا ہو کہ گویا آپ خود وہاں موجود ہیں۔ سی وی کو تخلیقی بنائیں لیکن خیال رہے کہ اس چکر میں اپنے سی وی کو گولا گنڈا نہ بنا ڈالیں۔

کارپوریٹ کلچر میں فٹ ہونا

آجکل زیادہ تر کمپنیوں کو Co-Workersکی ضرورت ہوتی ہے۔ وہ ایسے امیدوار وں کی تلاش میں ہوتے ہیں جو اتنے ذہین ہوں کہ تیزی سے کارپوریٹ کلچر میں فٹ ہو جائیں ، یعنی ٹیم کا حصہ بن جائیں۔ اگر آپ کے پاس اضافی صلاحیت ہے تو آپ اپنی ٹیم کی کامیابی میں اہم کردا ر ادا کرسکتے ہیں۔

سوشل میڈیا کی اہمیت

سوشل میڈیا پر آپ کی آن لائن شناخت آپ کیلئے فائدہ مند یا پھر نقصان دہ ثابت ہو سکتی ہے۔2017ء میں یہ ٹرینڈ آیا تھا کہ ہائرنگ منیجرز آن لائن سوشل میڈیا پیجز کو مدنظر رکھتے ہوئے امیدواروں کو جاب کی خوشخبری سناتے تھے، آپ بھی سوشل نیٹ ورکنگ کے ذریعے اسی طرح کا فائدہ حاصل کرسکتے ہیں۔ اس مقصد کے لیے لنکڈ ِان، ٹویٹر، فیس بُک اور اس جیسے پلیٹ فارمزآپ کا ذاتی برانڈ تخلیق کرتے ہیں۔ آپ ان پلیٹ فارمز کو اپنی فیلڈز سے متعلق بات چیت کے لیے استعمال کرسکتےہیں۔ اگرآپ کسی گروپ میں ’’ ایکسپرٹ ‘‘ کی حیثیت سے موجود ہیں توآپ کا کام بہت آسان ہو جاتا ہے۔ آپ کو ان سوشل میڈیا پیجز کو اپنے سی وی میں ضرور شامل کرنا چاہئے۔

عددی کامیابیوں کا ذکر کریں 

اپنی سی وی میں ہائرنگ منیجرز کو بتائیں کہ آپ نے وہ کونسی کامیابیاں حاصل کی ہیں، جن کی پیمائش کی جاسکتی ہے۔ آپ کو اپنی مخصوص کامیابیوں کا ذکر واضح طو ر پر کرنا ہوگا، جیسے کہ آپ کی کاوشوں سے کمپنی کی سیلز میں 40فیصد اضافہ ہوا۔