ورلڈ میری ٹائم ڈے پر امیر البحر کا پیغام

24 ستمبر ، 2020

ورلڈ میری ٹائم ڈے پر پاک بحریہ کے سربراہ کا پیغام

ورلڈ میری ٹائم ڈے 2020ء کے موقع پر پاک بحریہ کے سربراہ ایڈمرل ظفر محمود عباسی نے پیغام جاری کیا ہے جس میں کہا ہے کہ سمندر کی اہمیت اور تحفظ پر توجہ مبذول کرانے کیلئے ہر سال پوری دنیا میں ورلڈ میری ٹائم ڈے منایا جاتا ہے۔

انہوں نے کہا ہے کہ اس سال میری ٹائم کے عالمی دن کا موضوع ’مستحکم کرۂ ارض کیلئے مستحکم جہاز رانی‘ ہے، بین الاقوامی معیشت کا زیادہ تر انحصار جہاز رانی سے متعلقہ سرگرمیوں پر ہے۔

سربراہ پاک بحریہ نے کہا ہے کہ قدرت نے پاکستان کو ایک ہزار کلومیٹر سے زائد طویل ساحلی پٹی سے نوازا ہے، پاک چین اقتصادی راہداری سے بھرپور استفادے کیلئے ملک میں بحری شعبے کی ترقی ناگزیر ہے۔

ایڈمرل ظفر محمود عباسی نے کہا کہ حکومتِ پاکستان کی جانب سے 2020ء کو بلیو اکانومی کا سال قرار دینا ایک مثبت قدم ہے۔

نیول چیف نے اپنے پیغام میں کہا ہے کہ سمندری تحفظ کے روایتی اور غیر روایتی چیلنجز کے ساتھ ساتھ بڑھتی ہوئی سمندری آلودگی ایک سنگین مسئلہ ہے۔

انہوں نے کہا کہ ان مسائل کے حل کیلئے تمام ساحلی ممالک کی جانب سے مشترکہ کوششوں کی ضرورت ہے، پاک بحریہ ریجنل میری ٹائم سیکیورٹی پٹرول کے ذریعے علاقائی سمندری تحفظ کو یقینی بنانے میں اہم کردار ادا کر رہی ہے۔

یہ بھی پڑھیے

امیر البحر نے کہا کہ پاک بحریہ سمندری دفاع کے ساتھ ساتھ ملک میں میری ٹائم کے شعبے سے متعلق آگاہی اور بلیو اکانومی کے فروغ کیلئے سرگرم ہے۔

چیف آف دی نیول اسٹاف نے مزید کہا ہے کہ بندرگاہوں کی صفائی، سمندر میں تیل کے رساؤ کی روک تھام اور ساحلی علاقوں میں مینگرووز کی شجرکاری سمندری ماحولیاتی نظام کے تحفظ کیلئے پاک بحریہ کے اہم اقدامات ہیں۔

پاک بحریہ کے سربراہ ایڈمرل ظفر محمود عباسی کا یہ بھی کہنا ہے کہ پاک بحریہ سمندری شعبے کی ترقی بالخصوص جہاز رانی کی صنعت کے فروغ کیلئے بھرپور تعاون کے عزم کا اعادہ کرتی ہے۔

تازہ ترین