کورونا وائرس: پاکستان 20 ویں نمبر پر پہنچ گیا

پاکستان میں کورونا وائرس کے نئے کیسز اور اس سے اموات میں مسلسل کمی جبکہ اس سے شفایاب ہونے والوں میں اضافہ ہو رہا ہے جس کی وجہ سے ملک کورونا مریضوں کی تعداد کے حوالے سے ممالک کی فہرست میں 20 ویں نمبر پر آ گیا ہے۔

نیشنل کمانڈ اینڈ آپریشن سینٹر کے مطابق گزشتہ 24 گھنٹوں کے دوران 747 نئے کورونا وائرس کے کیسز سامنے آ گئے، مزید 5 افراد اس موذی وباء کے سامنے زندگی کی بازی ہار گئے جبکہ 541 مریض اس بیماری سے شفایاب ہو گئے۔

پاکستان میں کورونا وائرس کے کیسز کی تعداد 3 لاکھ 12 ہزار 263 ہو چکی ہے، جبکہ اس موذی وباء سے جاں بحق افراد کی کُل تعداد 6 ہزار 479 تک جا پہنچی ہے۔

کورونا وائرس کے ملک میں 8 ہزار 903 مریض اب بھی اسپتالوں، قرنطینہ مراکز اور گھروں میں آئسولیشن میں ہیں، جن میں سے 467 کی حالت تشویش ناک ہے جبکہ 2 لاکھ 96 ہزار 881 مریض اس بیماری سے صحت یاب ہو چکے ہیں۔

سربراہ WHO کی پاکستان کی دوبارہ تعریف

عالمی اداۂ صحت (ورلڈ ہیلتھ آرگنائزیشن) کے سربراہ ٹیڈروس ادھانوم نے کورونا وائرس کی وباء کے خلاف مؤثر اقدامات پر ایک مرتبہ پھر پاکستان کی تعریف کی ہے۔

سندھ میں کورونا وائرس کے مریضوں کی تعداد دوسرے صوبوں سے زیادہ 1 لاکھ 36 ہزار 795 ہو چکی ہے، جبکہ یہاں اس موذی وائرس سے اموات بھی دیگر صوبوں سے بڑھ کر 2 ہزار 497 ہو گئیں۔

پنجاب میں کورونا وائرس کے اب تک 99 ہزار 378 مریض سامنے آئے ہیں جبکہ اس سے ہلاکتیں 2 ہزار 234 ہو گئیں۔

خیبر پختون خوا میں کورونا وائرس کے مریضوں کی تعداد 37 ہزار 776 ہو چکی ہے جبکہ اس سے اموات 1 ہزار 259 ہو گئیں۔

وفاقی دارالحکومت اسلام آباد میں 16 ہزار 581 کورونا وائرس سے متاثرہ مریض اب تک سامنے آئے ہیں جبکہ 182 افراد اس وباء سے جان کی بازی ہار چکے ہیں۔

کورونا وائرس کے بلوچستان میں 15 ہزار 257 مریض اب تک رپورٹ ہوئے ہیں جہاں 145 افراد اس مرض سے انتقال کر چکے ہیں۔

گِلگت بلتستان میں 3 ہزار 778 کورونا وائرس کے مریض سامنے آئے ہیں جبکہ اس سے 88 افراد جاں بحق ہوئے ہیں۔

آزاد جموں و کشمیر میں کورونا وائرس کے اب تک 2 ہزار 698 مریض رپورٹ ہوئے ہیں جبکہ اس وائرس سے 74 مریض وفات پا چکے ہیں۔

نیشنل کمانڈ اینڈ آپریشن سینٹر کے مطابق ملک بھر میں گزشتہ 24 گھنٹوں کے دوران 32 ہزار 31 کورونا وائرس کے ٹیسٹ کیے گئے جبکہ اب تک کُل 35 لاکھ 14 ہزار 237 کورونا ٹیسٹ کیے جا چکے ہیں۔