آپ آف لائن ہیں
ہفتہ6؍ربیع الاوّل 1442ھ 24؍اکتوبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group


سابق وزیرِ اعظم میاں نواز شریف کی صاحبزادی اور مسلم لیگ نون کی نائب صدر مریم نواز شریف اپوزیشن جماعتوں کے اتحاد پاکستان ڈیمو کریٹک موومنٹ (پی ڈی ایم) کے آج ہونے والے جلسے میں شرکت کرنے کے لیے لاہور سے کراچی پہنچ گئیں۔

مریم نواز کا کراچی پہنچنے پر ایئرپورٹ کے باہر مسلم لیگ نون کے کارکنوں کی بڑی تعداد نے استقبال کیا۔

مریم نواز کیلئے پیپلز پارٹی نے گاڑی بھیجی

کراچی ایئرپورٹ سے مریم نواز پیپلز پارٹی کی جانب سے بھیجی گئی پی پی رہنما شرجیل میمن کی خصوصی بم پروف گاڑی میں سوار ہو کر مزارِ قائد کی جانب ریلی کی شکل میں روانہ ہوئیں۔

مسلم لیگ نون کی نائب صدر مریم نواز قومی ایئر لائن پی آئی اے کی پرواز پی کے 303 کے ذریعے لاہور سے کراچی پہنچی ہیں، انہوں نے جہاز کی اکانومی کلاس میں سفر کیا۔

مریم نواز کی گاڑی نون لیگ کے رہنما اور سابق گورنر سندھ محمد زبیر ڈرائیو کر رہے ہیں۔

مریم نواز کے ہمراہ ان کے شوہر کیپٹن ریٹائرڈ محمد صفدر کے علاوہ نون لیگی رہنما شاہ محمد شاہ بھی موجود ہیں۔

مریم نواز ایئر پورٹ سے ریلی کی صورت میں مزارِ قائد جائیں گی، جہاں وہ بانیٔ پاکستان قائدِ اعظم محمد علی جناح اور ان کی ہمشیرہ فاطمہ جناح کے مزار پر حاضری دیں گی اور فاتحہ خوانی کریں گی۔


شارع فیصل پر استقبالیہ کیمپ پر نون لیگ کے کارکنان کی بڑی تعداد موجود ہے جو ڈھول کی تھاپ پر رقص کر رہے اور نعرے لگا رہے ہیں۔

ذرائع کا کہنا ہے کہ پی ڈی ایم کے جلسے سے پہلے پی ڈی ایم کی قیادت جلسے سے پہلے مقامی ہوٹل میں ملے گی جہاں رہنماؤں کا اجلاس ہوگا۔

جلسے کیلئے مولانا فضل الرحمٰن پہلے سے کراچی میں موجود

پی ڈی ایم کے سربراہ مولانا فضل الرحمٰن پہلے ہی مقامی ہوٹل میں موجود ہیں، مریم نواز بھی مزارِ قائد پر حاضری کے بعد مقامی ہوٹل پہنچیں گی۔

پی ڈی ایم کے رہنما جلسے میں خطاب کے حوالے سے حکمتِ عملی طے کریں گے۔

مریم نواز کراچی میں 2 دن قیام کریں گی، اس دوران وہ اپوزیشن جماعتوں کے اتحاد پاکستان ڈیمو کریٹک موومنٹ (پی ڈی ایم) کے آج ہونے والے جلسے سے خطاب کریں گی جبکہ پارٹی کی تقریب میں بھی شرکت کریں گی۔

اس سے قبل نائب صدر مسلم لیگ نون مریم نواز جاتی امراء لاہور سے روانہ ہوئیں تو ان کے شوہر کیپٹن ریٹائرڈ محمد صفدر اور مسلم لیگ نون کی ترجمان مریم اورنگ زیب بھی ان کے ہمراہ تھیں۔

کراچی روانگی سے قبل مریم نے کیا کہا ؟

جاتی امراء سے ایئر پورٹ روانگی کے وقت مریم نواز نے میڈیا سے گفتگو کرتے ہوئے کہا کہ وزیرِ اعظم عمران خان کی تقریر ہارے ہوئے شخص کی تقریر تھی۔

انہوں نے یہ بھی کہا کہ میاں نواز شریف نے ہارے ہوئے شخص کو ایڈریس نہیں کیا، حکومت کو کچھ دکھائی نہیں دے رہا، ان شاء اللّٰہ تھوڑے دنوں میں سب نظر آ جائے گا۔



واضح رہے کہ اپوزیشن جماعتوں کے اتحاد پاکستان ڈیموکریٹک موومنٹ (پی ٹی ایم) کی حکومت ہٹاؤ تحریک کا دوسرا جلسہ آج ملک کے سب سے بڑے شہر کراچی میں ہو رہا ہے۔

منتظمین کاجلسہ گاہ میں 50 ہزار کرسیاں لگانے کا دعویٰ

منتظمین کی جانب سے دعویٰ کیا گیا ہے کہ جلسہ گاہ میں 50 ہزار سے زائد کرسیوں کا انتظام کیا گیا ہے۔

جلسے میں پاکستان پیپلز پارٹی (پی پی پی)، مسلم لیگ نون ، جمعیت علمائے اسلام (جے یو آئی) ف سمیت دیگر اپوزیشن جماعتیں شریک ہوں گی۔

جلسے سے بلاول بھٹو زرداری، مریم نواز، مولانا فضل الرحمٰن سمیت دیگر رہنما خطاب کریں گے۔

پاکستان پیپلز پارٹی کراچی جلسے کی میزبان

کراچی کے جلسے کی میزبانی پاکستان پیپلز پارٹی کر رہی ہے جس کے لیے باغِ جناح میں 3 مختلف اسٹیج بنائے گئے ہیں، مرکزی اسٹیج قائدین و مرکزی رہنماؤں کے لیے بنایا گیا ہے، مزید 2 اسٹیجوں پر دیگر رہنما بیٹھیں گے۔

جلسہ گاہ اور اطراف میں دیو قامت اسکرینز اور طاقتور ساؤنڈ سسٹم نصب کیا گیا ہے، جبکہ اسٹیج کے سامنے خاردار تار اور اطراف میں کنٹینرز لگا کر دیوار بنائی گئی ہے۔

جلسہ گاہ میں خواتین شرکاء کے بیٹھنے کے لیے خاردار تاروں کے حصار میں الگ حصہ مختص کیا گیا ہے۔

قومی خبریں سے مزید