فرمان الہی
نماز کے اوقات
بلوچستان میں کورونا وائرس کے پھیلاؤ کے باعث تعلیمی اداروں میں تعطیلات جلد کرنے کا فیصلہ کیا گیا ہے۔
بلوچستان کے وزیرِ تعلیم سر دار یار محمد رند کہتے ہیں کہ تعلیمی اداروں میں موسمِ سرماکی تعطیلات یکم دسمبر سے ہوں گی۔
ان کا یہ بھی کہنا ہے کہ نیا تعلیمی سال 3 ماہ کی تعطیلات کے بعد مارچ میں شروع کیا جائے گا۔
واضح رہے کہ بلوچستان میں کورونا وائرس کے نئے کیسز میں اضافے کا رجحان جاری ہے، 24 گھنٹوں کے دوران 8 طالب علموں سمیت کورونا کے 42 نئے مریض سامنے آگئے، جبکہ کورونا میں مبتلا 50 مریض صحت یاب ہو گئے۔
محکمۂ صحت بلوچستان کی جانب سے جاری کی گئی رپورٹ کے مطابق پیر کے روز صوبے میں 356 افراد کے کورونا وائرس کے ٹیسٹ کیئے گئے۔
ان ٹیسٹ کے نتیجے میں صوبے کے 3 اضلاع سے 42 نئے کیسز سامنے آگئے، جس کے بعد صوبے میں اب تک کورونا وائرس سے متاثر ہونے والوں کی مجموعی تعداد 16 ہزار 449 ہو گئی۔
رپورٹ کے مطابق 24 گھنٹوں کے دوران کورونا وائرس میں مبتلا 50 مریضوں کے صحت یاب ہونے کے بعد صوبے میں صحت یاب ہونے والوں کی تعداد 15 ہزار 902 ہو گئی۔
صوبے میں کورونا وائرس کے ایکٹو مریضوں کی تعداد 391 ہے جبکہ 340 افراد کے کورونا ٹیسٹ کے نتائج آنا ابھی باقی ہیں۔
محکمۂ صحت کے مطابق صوبے میں کورونا وائرس کے باعث انتقال کر جانے والوں کی مجموعی تعداد 156 ہے۔
بلوچستان کے محکمۂ صحت کی رپورٹ کے مطابق صوبے کے تعلیمی اداروں میں مزید 8 طالب علموں کے کورونا وائرس کے ٹیسٹ مثبت آنے کے بعد صوبے میں کورونا وائرس میں مبتلا طالب علموں کی تعداد 854 ہو گئی ہے۔
محکمۂ صحت بلوچستان کا یہ بھی کہنا ہے کہ کوئٹہ میں 24 گھنٹوں کے دوران کورونا وائرس کے 261 ٹیسٹ کیئے گئے، اس دوران کورونا وائرس کے 20 نئے مریض سامنے آئے، یوں کوئٹہ میں آج کورونا وائرس کی شر ح 7 اعشاریہ 6 رہی۔
